Tut en tut èn las acziuns s'augmentadas durant ils ultims 20 onns per circa 40%. Ils motivs per quest augment sajan tranter auter la creschientscha da la populaziun sco er l'augment dal traffic e dal turissem en la regiun. Plinavant èn las persunas era pli sensiblas e pli attentas e telefoneschan pli svelt al clom d'agid che avant in pèr onns, declera il manader da l'uniun da salvament, Renato Moresi. Per pudair garantir en il futur in provediment d'urgenza pli svelt e pli fidaivel ha l'uniun da salvament Cuira lantschà il project «Curaschi».
Nova posiziun per la basa da salvament
In element central dal project «Curaschi» è era la construcziun d'ina nova basa da salvament en in auter lieu. Suenter 15 onns en l'ospital da la Crusch a Cuira, mida l'uniun da salvament Cuira ses lieu da la basa en il conturn dal Rossboden en la via La Nicca a Cuira.
Quel nov lieu da la basa da salvament porta blers avantatgs per els co era per las pazientas ed ils pazients. Tras quel nov post pon ils vehichels da servetsch intervegnir pli svelt.
La sfida cun la basa tar l'ospital da la Crusch a Cuira èn las zonas da tempo 30, surtut la via da Loë sco er il traffic sin la via da Masans.
Era sche la nova basa da salvament na sa chatta en l'avegnir betg pli sper l'ospital chantunal, resta la collavuraziun cun ils medis e las medias d'urgenza fitg stretga, agiunta Renato Moresi. Er ils vehichels e l'entir servetsch da l'uniun restan medems. Nova è percunter l'entira infrastructura cun cundiziuns pli modernas.
Las lavurs da fabrica
Il nov edifizi en la via La Nicca vegn fabritgà e realisà da l'interpresa Nocasa. Els han gia cumenzà cun las lavurs da fabrica il november 2025. L'entir project custa circa 25 milliuns francs e quels custs vegnan surpigliads da la citad da Cuira.
Nus vulain bajegiar ina chasa da commerzi cun circa 8000 m². Qua vegnan en divers affittaders, tranter auter architects, in'industria sco era la chasa da parturir. E natiralmain era la basa da salvament Cuira.
La finamira saja da terminar il project da quest edifizi il settember 2027.