Las medias grischunas localas e regiunalas da lingua taliana s'uneschan ad ina plattafurma communabla. En il rom da l'Expo Valposchiavo 2025, la messa da la regiun Bernina, vegn preschentada «GRI.media». I sa tracta da la nova plattafurma da web dad infoGrigione per las quatter medias online talianas dal Grischun.
Il portal sa preschenta sco ina sort «abitaziun da proprietad digitala» cun quatter entradas independentas – che duain star simbolicamain per las quatter gasettas – dentant cun spazis cuminaivels che promovan la collavuraziun tranter las redacziuns ed il barat da cuntegns.
La plattafurma integrescha era tut ils artitgels da la redacziun da lingua taliana da Keystone-ATS a Cuira ch'è en funcziun per 100% dapi il settember 2024.
Ils custs
Ils custs da var 220'000 francs da realisar il portal GRI.media è vegnì pajà cumplainamain dal chantun Grischun. Per l'avegnir vul infoGrigione garantir la finanziaziun dals custs currents e dals custs per sviluppar la plattafurma, uschia che quests custs na vegnan betg adossads a las singulas medias.
