La Viafier retica è cuntenta cun l'onn da gestiun 2022 che resulta ad in gudogn da 4,2 milliuns francs. Suenter in cumenzament retegnì pervi da las mesiras da corona è la dumonda sa revegnida nunspetgadamain spert. Dapi la primavaira è la bilantscha dal transport da persunas ed autos per part cler meglra che la valur excellenta dal 2019.
Il resultat 2022 è fitg legraivel. Nus n'avain betg spetgà che nus sa revegnin uschè spert da la pandemia. Ed il 2023 ha cumenzà anc meglier.
Transportar persunas ed autos renda
Tar il transport da persunas han ins bunamain cuntanschì uschè bler retgav e kilometers da persunas sco l'onn 2019. Il gudogn en quest segment è 2,5 milliuns francs. Er il transport d'autos ha rendì cun in gudogn da 2 milliuns. En omadus segments è il grad da la cuvrida dals custs s'augmentada.
Mender vesi ora tar il traffic da rauba. Là perda la Viafier retica 1,4 milliuns pervi da custs consecutivs dad investiziuns e midadas tar locomotivas. Ed er en il segment da l'infrastructura resulta ina perdita da 2,5 milliuns.
Cifras dal 2022
- 8'556'000km da tren
- 1'518 collavuraturs e collavuraturas
- 97 emprendists ed emprendistas
2023 ha cumenzà bain
Durant ils emprims mais da quest onn ha il trend positiv cuntinuà. Spezialmain ils trens da panorama èn dumandads. La vista en il futur restia dentant intscherta. Il squitsch da custs aut e la limitaziun dals meds porscha sfidas per l'interpresa. Plinavant resta il volumen dad investiziuns e la necessitad da modernisar auts.
