Siglir tar il cuntegn

Open House Rheintal Open House: in sguard davos las portas da Cuira

Ils 25. e 26. d'avrigl ha gì lieu per l'emprima giada il Open House a Cuira. Persunas interessadas han pudì ir a guardar libramain 40 edifizis en l'entira citad da Cuira – e l'interess è stà grond.

En la segunda auzada dal nov bajetg da lain sper il Türligarta cumenza l'emprima ediziun dal format Open House a Cuira. Da mintga quartier da Cuira penda in placat en la gronda stanza: il Rheinquartier, Cuira Vest, il Welschdörfli. L'architect da 27 onns Romero Ratti ha fundà cun dus amis da studi in'atgna uniun, l'uniun Open House Rheintal- e cun quella han els ussa purtà a Cuira quest format.

«Nus enconuschevan gia il format Open House da noss studi», declera il giuven architect. «Lura avain nus pensà insacura – quai duvrassi er tar nus!»

40 differents edifizis ed objects fan part dal Open House Cuira 2026 – da chasas privatas sur edifizis publics fin ierts. Durant dus dis po mintgina e mintgin visitar gratuitamain quests lieus ed accumpagnar differents guids, sco ch'el declera. «Pil pli èn ils architects sezs quels che fan il guid – uschia survegn ins anc ina invista pli profunda!»

Propi grondius, tantas persunas interessadas vi da l'architectura! Jau hai survegnì oz en damaun plirs telefons – qua stattan 60 persunas, qua 50, co agir? Jau hai pensà, uiuiui!
Autur: Romero Ratti President «Open House Rheintal»

In da quests guids ha lieu tar las ovras da protecziun dals stgavaments romans en il Welschdörfli. Dus edifizis stgirs cun mintgamai mo ina fanestra protegian las exchavaziuns – avant l'emprima guida eran gia sa radunadas passa 20 persunas davant l'edifizi. Marina Casaulta dal Servetsch archeologic fa la guida tras las duas ovras che stattan sco duas capslas sin l'exchavaziun.

Ella maina la gruppa a mirs antics ed exchavaziuns dal temp roman. Sumegliant èsi era tar ils auters edifizis ed objects ch'ins po visitar oz en mintga quartier da Cuira - uschia era en la citad veglia, tar in'abitaziun en il mir medieval da la citad.

Cuntrari al edifizi da protecziun dals exchavaments n'èsi betg adina pussaivel da survegnir in'invista en l'abitaziun che vegn il mument renovada - quella è numnadamain privata. Las plazzas d'ina visita guidada èn limitadas qua a 15 persunas - sin la stretga via avant l'entrada èn sa dentant radunadas passa 30 persunas, ed i vegn adina dapli.

Jau m'interessava per l'architectura e vuleva vesair ina giada. co ch'els han fatg quai a Cuira.
Autur: Visitadra

Ils blers ston trair en il chau per vegnir en e l'aria tranter las paraids massivas è frestga. La stgala da crap stretga, che maina en l'emprima auzada, ha en mintga stgalim fessas profundas ed ins vesa bain tge parts ch'èn gia vegnidas renovadas: Laina clera e nova stat en cuntrast cun las paraids stgiras.

Malgrà la restricziun han tuts astgau entrar en l'abitaziun veglia e stretga, denter els è Romero Ratti, president da l'uniun Open House Val dal Rain. L'emprim Open House a Cuira para damai d'avair success – ils organisaturs ston far dapli ch'avunda quels dus dis.

Artitgels legids il pli savens