Per Martin Candinas è cler, uss sto schabegiar insatge. Las cifras d’infecziuns giajan enavos ed ussa dovria la populaziun perspectivas. E perquai sustegn il cusseglier naziunal da l'Allianza dal center era la pretensiun da la regenza grischuna, che las terrassas da las ustarias duain gia dastgar avrir il prim da mars.
Nus na pudain betg tegnair tut a bas enfin che nus n’avain nagins cas da corona pli. Nus stuain era guardar per ils interess da la societad e da l’economia.
Ma el na vul betg chalar là. Tenor el stoi era esser pussaivel da bainspert puspè avrir dal tut las ustarias en Svizra. Il Grischun haja mussà che quai funcziuneschia. Durant ils dis tranter Nadal e Bumaun haja noss chantun gì il dubel dumber da populaziun e las cifras d'infecziuns sajan tuttina idas enavos, malgrà hotels plains e terrassas avertas en ils territoris da skis. Quai mussia bain, ch'ils concepts da protecziun funcziuneschian. «Igl è simplamain da controllar cleramain che quests concepts da protecziun vegnan resguardads. Là stuain nus metter il focus e betg sin scumonds.»
Terrassas bain, ustarias spetgar
Sustegn en chaussa terrassas survegn Candinas era da sia collega socialdemocrata, Sandra Locher-Benguerel. Ella sustegna era la posiziun da la regenza grischuna che na vesa nagin privel dad era avrir ils teaters ed ils kinos, quai cun in obligatori da purtar ina mascrina e cun in bun concept da protecziun.
Sceptica è ella dentant, sch'i va per lubir a las ustarias da servir lur osps era endadens. Qua dettia simplamain clers mussaments ch'il privel da s'infectar cun il coronavirus saja en in local pli grond che sin ina terrassa sut tschiel avert. Ils davos mais hajan era mussà, ch'i saja fitg grev da prevesair la dinamica da la pandemia ed il svilup dal virus. Dad ussa gia vulair decider e scriver en la lescha che las ustarias vegnan avertas ils 22 da mars, saja perquai pauc prudent, manegia ella.
Ins na po betg simplamain pretender averturas, ins sto era accumpagnar quellas cun mesiras sco tests. Memia spert far pass d’avertura memia gronds, da quai avertesch jau.
Privel che la populaziun perda pazienza
Qua ha Magdalena Martullo ina tut autra opiniun. La cussegliera naziunala da la PPS pretenda ch'il Cussegl federal fetschia uss vinavant e chalia da franar. Il Cussegl federal stoppia ussa tadlar sin ils chantuns e sin la politica e suandar il giavisch da l'economia e schluccar las mesiras.
Nus avain spetgà gia ditg, memia ditg. Las cifras èn bassas, las vaccinaziuns cuntinueschan e perquai pudain nus era avrir pli fitg.
Ella na craja era betg che la situaziun vegnia ussa a sa midar uschè fitg, sch'ins avria puspè las ustarias. Il cas cuntrari stoppian ins halt puspè reagir. Pli impurtant saja dentant il mument da dar a la populaziun ina perspectiva. Uschiglio perdia la populaziun la pazienza. «Talas tendenzas pon ins gia observar. Ch’ins di ch’ins na laschia betg pli plaschair quai dal Cussegl federal e fetschia lura quai ch’ins veglia far. Quai fiss segir il pli grond ristg ch’i dess dapli infecziuns.»
Las spetgas vers il Cussegl federal èn pia grondas, il squitsch immens. Cler è dentant gia ussa - a tuts na vegn el betg a pudair far endretg.
