Maurizio Michael è il nov president da la PLD grischuna. El succeda a Bruno Claus ch'ha manà la partida dapi il 2014. Michael è da Castasegna, in vitg en la vischnanca da Bregaglia. Avant el è stà plirs onns vicepresident da la PLD grischuna.
Suenter 10 onns ha la PLD Grischuna puspè in nov president. Maurizio Michael è stà scolast, sviluppader regiunal ed è gia dapi blers onns activs en la politica. El è deputà en il Cussegl grond ed è stà en la suprastanza dals liberaldemocrats, perquai enconuscha el fitg bain las sfidas che spetgan el.
La PLD stat per ina politica seriusa, per soluziuns e na betg mo per discussiuns. Soluziuns seriusas che van en la profunditad.
Ina da las grondas finamiras per il proxim temp è dad er motivar giuvens d'entrar en la partida, co exact che quai duai succeder na sappia el dentant anc betg dir. In'autra finamira en vista a las proximas elecziuns en dus onns è da chattar avunda candidatas e candidats.
Jau na chapesch betg mo linguisticamain tuts.
Maurizio Michael è creschì si en Bregaglia ha dentant er ragischs rumantschas, pli precis sutsilvanas. El è pia in president che discurra tuttas trais linguas uffizialas dal Grischun.