Patrik Degiacomi, il local da consum a Cuira è avert dapi bun trais mais. Tge midadas constatais Vus cun ir tras la citad?
Jau n'hai betg il sentiment ch'ins entaupa pli paucas persunas da la scena, damai che quellas sa movan vi e nà tranter il local da consum ed il spazi public. Nus survegnin resuns da la polizia sco era d'abitants da la citad veglia che la scena saja vegnida pli ruassaivla ed i dettia damain agressivitad.
Mintga di han lieu 100 fin 160 consumaziuns en il local da consum e betg pli en il Stadtpark u en auters lieus publics. Cunquai che la vendita da las drogas è part da l'entir process, era la situaziun en la publicitad pli baud colliada cun bler stress ed agressiuns, quai ch'è uss sa reducì.
Il local da consum è avert da las 11:00 fin las 19:00. Durant ina orientaziun da medias è vegnì pledentà ch'i dettia la damaun problems cun batlegim e che la situaziun na saja betg sa midada durant la notg. Pudess in manaschi cuntinuant dal local da consum far senn?
In manaschi da 24 uras n'exista er betg en las autras citads cun spazi da consum e fiss ina gronda chargia per il quartier. In schlargiament da las uras d'avertura dal local da consum na s'impona dentant il mument insumma betg.
Nua datti in basegn d'agir?
A nus mancan meglras e pli variadas purschidas en il sectur d'abitar. I dat fin uss il «housing first», nua che persunas dependentas survegnan in'abitaziun e dastgan consumar a chasa en in rom assistì, quai che n'era fin uss betg pussaivel en dormitoris d'urgenza u en l'abitar accumpagnà.
Autras citads porschan per la notg dapli indrizs survegliads pli fitg u accumpagnads che van pli lunsch ch'il concept da «housing first». Per ina tscherta gruppa da malsauns da dependenza na tanscha il concept da «housing first» betg. I dat memia paucs plazs «housing First» ed era ina lunga glista da spetga. La purschida n'è era betg adattada per tut ils involvids.
Vus avais tematisà en il parlament grischun in project da pilot da Genevra davart la distribuziun da cocain a persunas grev dependentas ed avais dumandà davart il potenzial per il chantun Grischun. La reacziun dal chantun è stada plitost sceptica. È la citad exnum dependenta dal chantun per in tal project, u pudess ella iniziar sezza quai?
La citad na po betg realisar sezza quai. I dovra ina instituziun medicinala, nua che medis – betg mo persunal da tgira – mainan il project en il rom d'in experiment da pilot scientific. Cunquai che la citad da Cuira n'ha betg in'atgna instituziun medicinala stuess in'instituziun sco il servetsch psichiatric u l'ospital chantunal surpigliar questa part. En pli dovri ina permissiun dal chantun. La citad po sustegnair e far avanzar il project, dentant betg realisar independentamain per mancanza d'infrastructura e persunal dal fatg. En citads grondas che disponan d'agens ospitals è la situaziun da partenza autra. Il chantun n'ha il mument betg en il focus il tema.
Displascha quai a Vus?
Jau avess giavischà qua dapli curaschi, cunquai che la distribuziun controllada da heroin era da lez temp in mument decisiv ed ha sbassà massivamain la criminalitad liada a l'acquisiziun da drogas. Il chantun avess in ferm agen interess vi d'in tal project. Quel distgargiass la polizia, la procura publica e las dretgiras.
La criminalitad d'acquisiziun è er cun il local da consum tuttina auta. Datti autras mesiras che la citad po prender independentamain?
La collavuraziun tranter la polizia da la citad e la polizia chantunala è vegnida intensivada fermamain ils onns passads. Tras in'adattaziun da la cunvegna cun il chantun ha la polizia da la citad uss cumpetenzas extendidas e po far direct sez la registraziun da delicts da drogas. Quai distgargia il chantun ed augmenta l'effizienza dal sistem general. La collavuraziun da las polizias funcziuna excellentamain. Quai enturn il local da consum, a la staziun ed ensemen cun la polizia da transport da la SBB.
Il dispositiv vegn adattà cuntinuadamain a la situaziun actuala.
En pli distgargian quatter plazzas cumplainas supplementaras per assistents da segirezza la polizia da la citad considerablamain. Questas resursas vegnan duvradas intenziunadamain en il Stadtpark, en il quartier dal local da consum ed a la staziun, quai che rinforza il sentiment da segirezza. Dentant chaschuna quai er in lev spustament da la scena en territoris cunfinants. Ina midada decisiva da la criminalitad d'acquisiziun purtass pir la distribuziun da substituts da cocain en il rom d'in experiment da pilot scientific.
In sguard en l'avegnir: I dat il quità ch'il fentanil pudess, analog als svilups en l'exteriur, er daventar in tema a Cuira. Quant bain è il local da consum preparà per in tal scenari?
In local da consum è ordvart impurtant en cas che substanzas calmantas sco fentanil daventassan in tema. Fin uss era noss focus primarmain sin ils effects stimulants dal crack. Il local da consum è vegnì construì tenor recumandaziuns actualas dal fatg, quai che sa paja ussa. In element decisiv che manca anc è dentant il «drug checking». Quai vegn era giavischà fermamain dals consuments per pudair controllar substanzas a temp. L'integraziun da «drug checking» en il local da consum promovess vinavant l'utilisaziun da l'indriz ed augmentass massivamain la segirezza da las persunas dependentas.
Sche Vus guardais tschintg onns en il futur: Co è la situaziun a Cuira sa midada fin lura realisticamain?
Mes giavisch è ch'in «drug checking» finanzià dal chantun saja etablì en il local da consum e ch'i dettia cumplementarmain ina distribuziun da substanzas controllada dal stadi. Jau sun persvas ch'ins po uschia reducir a moda signifitganta la criminalitad d'acquisiziun e d'eliminar l'effect d'attracziun da la scena, uschia che la scena averta sa stabilisescha e sa sminuescha.