Cumpareglià cun las cifras da record da l’onn passà è il dumber da giasts stà durant la stagiun d’enviern 1% pli bass. L’enviern 2024/25 era stà la meglra stagiun dapi 15 onns. La svieuta da transport è s’augmentà l’enviern 2025/26 per 0,4%, sco Pendicularas Grischun scriva en sia communicaziun.
Memia pauc e memia blera naiv
Ina sfida saja stada l’enviern passà la naiv che haja mancà fin la fin da schaner. Quai haja mussà l’impurtanza da pudair ennavar per che las destinaziuns funcziuneschian, vegn cità il president da l’organisaziun Markus Moser en la communicaziun. Cura che la naiv saja arrivada il favrer, haja quai dà novas sfidas. Il privel da lavinas haja muntà da pudair avrir sulettamain parts dals territoris da skis. E la naiv dal favrer e mars n’haja betg tanschì per gulivar las cifras dals giasts pers en l’emprima part da la stagiun.
La Surselva ha patì il pli fitg
Las cifras tenor regiun mussan che las pendicularas en la Surselva han pers, cun in minus da 2,4% – il bler cumpareglià cun l’onn avant. Lev enavos è il dumber da giasts era sa sviluppà en las regiuns Tavau/Claustra ed Arosa/Lai inclusiv territoris vischins. In lev plus da giasts hai dà la stagiun d’enviern passada en l’Engiadina.
Resultat sumegliant per las pendicularas svizras
Era en l’entira Svizra han las pendicularas gì adina dapli giasts en il decurs da l’enviern. En tut è la finala resultà in lev minus dal dumber da giasts per 2%, cumpareglià cun l’enviern 2024/25.
Ils territoris da skis en ils auts han gì in avantatg la stagiun d’enviern passada. Las destinaziuns sur 2’000 meters sur mar èn restadas sin il livel da l’onn avant. Territoris da skis en regiuns mez autas, tranter 1’500 e 2’000 meters, han stuì registrar in minus da 3%. Patì il pli fitg da la situaziun da naiv tendida, cunzunt durant l’emprima perioda da la stagiun – han las regiuns sut 1’500 meters sur meter, cun in minus da 6%.
