Per Hansueli Roth è il cler Gea da la populaziun era in Gea per in svilup d'in vitg progressiv.
Ins spera natiralmain adina ch'i dettia in resultat positiv. Ma jau stoss dir sinceramain ch'il Gea cun 74,8% ha surpassà tut las aspectativas.
La cunterproposta ha gudagnà
Il 2021 ha gia dà ina votaziun davart ina chasa da parcar. Lezza giada stevan duas variantas a disposiziun: in’iniziativa dal pievel aveva pretendì ina chasa da parcar sin il parcadi «Alte Eisbahn». Sco cunterproposta aveva la suprastanza communala mess il project dal parcadi sutterran Casanna sin maisa – e per quel era il suveran da Claustra gia sa decidì da lez temp. La suprastanza ha sin quai elavurà in project per il qual las votantas ed ils votants da la vischnanca en il Partenz han oz dà lur consentiment.
Igl è stà in grond giavisch che nus na construin betg simplamain mo ina chasa da parcar. Cun quai na pon ins ozendi betg pli intgantar la glieud. Igl è impurtant che la populaziun vesa: Ah, en questa direcziun vai.
Per Hansueli Roth haja quai cler Gea pli probabel in connex cun il project sez: i na sa tractia betg mo dal parcadi sutterran, mabain er da la concepziun dal conturn. Quella è ina part dal project.
Ils proxims pass
Sco proxim vegnia la suprastanza ad inoltrar la dumonda da bajegiar per il project Casanna. Planisads èn 368 parcadis sutterrans. Ils custs muntan a radund 31 milliuns francs, cun ina toleranza da ±20 %.
Pertge investir uschè blers daners?
Il parcadi sutterran è in element central per render pli attractiva la via da staziun, ma er per metter a disposiziun dapli plazzas da parcadi centralas en vischnanca, di il president communal da Claustra, Hansueli Roth. En quest connex èn planisads ulteriurs projects enturn la via da staziun: La chasa da posta duai vegnir spazzada e remplazzada cun in nov edifizi cun abitaziuns ed ina surfatscha da vendita per la butia Migros. Er il Coop, situà be intgins meters pli engiu en la via da la staziun, duai vegnir renovà. La Viafier retica planisescha da sanar cumplettamain la staziun. La vischnanca vul profitar da quest mument per realisar il parcadi sutterran. L'intenziun è plinavant er da colliar las garaschas privatas sutterranas enturn la plazza da construcziun.
Era duai la situaziun da traffic en la via da la staziun vegnir miglierada cun il parcadi sutterran. Per il mument na saja quella betg ideala: la glieud giaja vinavant enavant ed enavos sin quella via cun la speranza da chattar in parcadi.
In parc cun potenzial sur la garascha sutterrana
La statica da la garascha sutterrana planisada è er stada tema da discussiun en ils gremis. Actualmain na prevesa la vischnanca da construir nagut sin la garascha, ma la statica dal nov bajetg vegn planisada uschia ch’i saja pussaivel da construir en l’avegnir er chasas d’abitar sin la surfatscha. Tuttina èsi previs da crear in parc avert per il public sin la garascha sutterrana.
Tge capita cun il chalet Montana?
Dasper la decisiun davart il credit per il parcadi sutterran, ha il suveran da Claustra er decidì tge che duai capitar cun la chasa che sa chatta sin il plazzal da construcziun. Tenor il president communal Hansueli Roth ha la suprastanza discutà cun il parlament communal, sch’ins duai spazzar la chasa e reconstruir ella sin il parc previs – quai custass radund 3,5 milliuns francs – u sch’il chalet duai vegnir spazzà definitivamain. En mintga cas duain las picturas da l’artist Alois Carigiet en il chalet Montana vegnir salvadas.
Il suveran da Claustra ha decidì da stgarpar giu il chalet Montana – era quai cun in cler Gea.
Nov president u nova presidenta communala
Per la fin da quest onn ha il president communal en uffizi Hansueli Roth demissiunà. Atgnamain avessan las votantas ed ils votants da Claustra pudì tscherner il president u la presidenta communala en in emprim scrutini la fin da settember. Quai però ha la vischnanca stuì stritgar. Il motiv: nagins candidats u candidatas per il post.
L'elecziun ha da nov lieu fin november. Hansueli Roth resta fin la fin da mars 2026 en il presidi, fin che la successiun è reglada tant enavant.
El chapescha ch'il presidi è in'incumbensa cun gronda responsabladad. Ins possia era svelt vegnir en ina posiziun difficila, sch’ins sto prender decisiuns che na vegnan betg acceptadas.
Igl è ina situaziun da partenza difficila. Davant porta stattan projects difficils, ed ins sa che qua en vischnanca regna in ferm cuntravent.
Per Hansueli Roth è il post però in bel, ed ins po er effectuar insatge en vischnanca. Il president actual è persvas ch'ins vegnia a chattar insatgi che vul surpigliar il presidi communal. El è er pront da prolungar ses mandat sco president – schizunt sche be per in pèr mais – per gidar ses successur u sia successura da vegnir en l'uffizi e da manar la vischnanca da Claustra.
Las persunas ch'èn interessadas, èn gia activ en ina professiun. Ensemen cun il presidi, dovra quai forsa memia bler temp.