Il WSL, l'Institut federal da perscrutaziun da guaud, naiv e cuntrada, classifitgesch il Grischun cun ina leva sitgira. Tut tenor regiun en Grischun po la situaziun dentant esser differenta.
En Surselva han ins gì tendenzialmain in deficit da plievgia. Quel è relativamain grond. Quai er en la Mesolcina. Las ulteriuras regiuns èn bun en media dals ultims quatter mais.
Ch'il zercladur è stà fitg sitgs na saja tenor el fin ussa betg problematic. E tuttina, sch'il terren ha in deficit d'umiditad, na possia quel betg tschitschar l'aua endretg. Uschè problematic na saja dentant anc betg, perquai ch'igl ha ils mais mars, avrel e matg pluvì proporziunalmain dapli ch'ils onns passads. Uschia han ins era pudì arcunar dapli aua en ils reservuars.
Ma, la sitgira actuala fa tuttina er intgins quitads a Remo Fehr, il manader da l'Uffizi per la natira e l'ambient dal Grischun. Sch'i giaja uschia vinavant sche pudessan tranter auter las alps survegnir difficultads pervia d'ina mancanza d'aua.
Alps prendan l’aua or d'auals. Sche quels na han betg bler aua pli, sche poi dar ina mancanza.
Sco el menziuna vinavant hajan actualmain dentant naginas regiuns grischunas stretgas cun l'aua.
Entras la midada dal clima saja en il futur da quintar cun dapli periodas da sitgira, undas da chalira u era stemprads. Er il Grischun vegn en avegnir ad avair da cumbatter pli e pli savens cun sitgiras e mancanza d'aua.
