Dapi il cumenzament da l'onn 2026 è la dumonda d'alloschis d'urgenza a Cuira creschida. Gist en il temp, cura ch'il termometer mussa mintgatant perfin temperaturas da nulla grads è l'alloschi d'urgenza en il Hohenbühlweg fitg plain.
Las persunas che dovran la chasa en il Hohenbühlweg èn tenor Carlo Schneiter surtut persunas senza tetg. Bleras da quellas cumbattan era cun ina dependenza da drogas u autras dependenzas.
Nus avain adina tranter 10 e 15 pernottaziuns. En ina notg pli fraida avain nus plitost gist 15 persunas.
Mintgatant pernotteschan era persunas che han pers lur lavur e che dovran ina schliaziun provisorica. Quellas persunas chattan per il solit era svelt puspè ina autra soluziun.
Per ina pernottaziun paj'ins 10 francs. En quel pretsch è er inclus ina tschaina ed in ensolver.
Dumbers creschents
La dumonda per l'alloschi d'urgenza è en ils ultims onns adina puspè creschida. En l'onn 2024 hai dà enturn 3'000 pernottaziuns. En l'onn 2025 eran quai lura 500 pernottaziuns dapli, pia 3'500 pernottaziuns.
Igl è il trend che nus avain mintga onn enturn 500 pernottaziuns dapli.
Sco motiv principal per quest svilup numna Carlo Schneiter ils pretschs da localitads e d'immobiglias a Cuira ch'èn s'augmentads fermamain. Bleras abitaziuns e chasas èn ils ultims onns vegnidas pli charas, uschia che bleras persunas cun paucs daners n'han betg pli pudì pajar quellas.
I dovra dapli abitaziuns ch'èn pli bunmartgadas ed i dovra dapli offertas specificas che stattan a disposiziun per persunas cun ina malsogna da dependenza.
La citad da Cuira è conscienza da questa problematica cun las persunas senza tetg e cun malsogna da dependenzas e lavura perquai era vi da differentas soluziuns. Il cusseglier da la citad Patrik Degiacomi di ch'els sajan tant vi da projects communals sco era chantunals.
Il chantun Grischun elavura numnadamain in project da pilot cun il num «Housing first». En quest project survegnan persunas senza tetg e cun ina malsogna da dependenzas in'abitaziun sco era sustegn per reducir il consum da drogas, uschia ch'ellas pon esser independentas e viver ina meglra vita.
Nus avevan adina puspè in augment linear tar nossas cifras da persunas senza tetg. Dapi l'introducziun da 'Housing First' ha quella linearitad pudì vegnir interrutta. Tuttina avain nus anc adina in augment.
I sajan actualmain tuttina anc enturn 30 persunas senza tetg e cun ina malsogna da dependenzas en la citad da Cuira e per quellas as stoppia anc chattar ina soluziun. Pia, era sche la situaziun è vegnida stabilisada, saja ella anc lung davent da là nua ch'ella duai esser.
Or da l'archiv: