Malgrà la bell'aura sur ils firads da Pasca è la populaziun grischuna sa tegnida bain vi da las reglas da corona. Tar las controllas rinforzadas hajan ins stuì chastiar fitg paucas persunas, ha René Schuhmacher da la Polizia chantunala ditg envers RTR. En tut haja la Polizia chantunala stuì reclamar 63 giadas e metter ora tschintg multas disciplinaras. La gronda part da las reclamaziuns han reguardà l'uschenumnà «social distancing».
Vias vidas
Che la glieud saja per gronda part restada a chasa, saja er sa mussà tar il traffic vers sid. Sin la ruta dal San Bernardino haja dà bler pli pauc traffic cumpareglià cun auters onns. Percunter haja dà dapli traffic sin las vias principalas, uschia la Polizia chantunala. En tut ha la polizia controllà 4'620 vehichels sur ils dis da Pasca.
Passa 60 acziuns a Son Gagl
En il chantun Son Gagl è la polizia vegnida en acziun plirs tozzels giadas. Tranter dumengia ed glindesdi da Pasca bun’ura haja dà 61 acziuns.
Sporadicamain haja la ella chastià persunas che sa chattavan sin plazzas serradas, uschia la Polizia chantunala da Son Gagl. Tar plirs shops a tancadis sajan gruppas pli grondas sa furmadas. La polizia haja rendì attent da tegnair avunda distanza durant star en colonna. Tuttina fa er ella bilantscha positiva dals dis da festa.
En general è l’entira populaziun svizra però sa tegnida bain vi da las reglas da corona.
