- L'incendi da guaud a Brusio n'è anc adina betg sut controlla. Quel era rut ora mardi suentermezdi cun brischar restanzas d'in plazzal.
- Sis helicopters e pumpiers èn stads en acziun per stizzar il fieu.
Ils pumpiers hajan pudì franar il fieu uschia ch'i n'arda nagin fieu avert pli en il guaud da Brusio. Quai ha il pledader da la polizia chantunala Markus Walser ditg envers l'agentura da novitads Keystone-SDA tard la mesemna suentermezdi. Dentant ardian adina puspè novs gnieus da fieu che stoppian vegnir stizzads, ha Walser agiuntà. Uschia ch'il fieu na saja anc adina betg dal tut sut controlla, era sch'i na dat nagin fieu avert pli.
La mesemna suentermezdi tard èn vinavant stads en acziun quatter helicopters civils, sco er dus helicopters da l'armada per lomiar la terra cun aua – quai vegn fatg per franar ils gnieus da fieu. La notg na vegnian quels helicopters dentant betg a sgular perquai che las ristgas sajan memia autas. Tenor Walser quint'ins dentant ch'ils helicopters vegnan puspè ad esser en acziun la gievgia avantmezdi.
Sur notg dettia ina guardia da fieu per tegnair en egl la situaziun. Co quella vegn a sa sviluppar saja dentant grev da dir – quai dependia fitg dal vent. In privel per la populaziun na dettia dentant betg.
Per cumbatter l'incendi sin il territori da la vischnanca da Brusio èn dapi mesemna bun'ura stads en acziun plirs helicopters sco era in super puma da l'armada. Las flommas eran sa derasadas sin ina surfatscha da dus kilometers quadrat en vischinanza dal viaduct da tren a Brusio. Per betg impedir las lavurs da stizzar è il spazi d'aria vegnì serrà, quai enfin gievgia saira.
-
Bild 1 von 5. L'incendi da guaud sin il territori da Brusio è sa derasà sin ina surfatscha da dus kilometers quadrat. Bildquelle: Polizia chantunala grischuna.
-
Bild 2 von 5. Bildquelle: Polizia chantunala grischuna.
-
Bild 3 von 5. Bildquelle: RSI.
-
Bild 4 von 5. Bildquelle: RSI.
-
Bild 5 von 5. Bildquelle: RSI.
Pervia dal privel da crudada da crappa circuleschan er vinavant nagins trens tranter Poschiavo e Tirano, quai enfin venderdi bun'ura. Serrada è er la via a Viano. Il vitg da 60 abitantas ed abitants è be cuntanschibel sin ina via forestala.
Tenor emprimas enconuschientschas è il fieu rut ora durant brischar restanzas d'in plazzal, ha communitgà la Polizia chantunala. Per quest intent haja dà ina lubientscha.
En las valladas dal sid èsi scumandà da far fieu
En las valladas dal sid grischunas regia il mument in scumond absolut da far fieu. Quai pervia dal privel d'incendis da guaud. Tant en il Puschlav sco er en il Mesauc, la Calanca e la Bregaglia na dastga uschia er betg vegnì durvrà fuainas fixas, quai communitgescha il chantun Grischun sin sia pagina online.
Il chantun ha ordinà mesemna bun'ura ils scumonds en la Val Poschiavo e Bregaglia. Mardi cura ch'il fieu è rut ora valiva in privel da fieu considerabel en il Puschlav, quai ha ditg sin dumonda da RTR l'Uffizi da privels da la natira dal Grischun. En Calanca ed il Mesauc èsi gia dapi ils 26 da mars scumandà absolutamain da far fieu.
