Il privel d'incendis da guaud è gia extrem en las valladas talianas dal Grischun damai che la plievgia è stada magra las davosas emnas. E vitiers mussian las prognosas per ils proxims dis aura sulegliva, ed in favugn per part ferm, sco il chantun scriva sin sia pagina d'avertiment. Perquai vala per il Puschlav, la Bregaglia, il Mesauc e la Val Calanca in scumond absolut da far fieu en il liber.
In privel considerabel d'incendis da guaud regia en l'Engiadina Bassa, ed en grondas parts dal Grischun dal Nord.
Tar privel grond suondan ils scumonds
Sch'il stgalim da privel vegn auzà da considerabel sin grond datti pli probabel er scumonds da far fieu:
- En vischinanza dal guaud, sin basa da la lescha da guaud.
- Scumonds locals tenor las autoritads communalas
- Scumonds u restricziuns en connex cun fieus artifizials (era en la cumpetenza da las vischnancas).