Igl è projects che vegnan realisads quest onn u purtads in pass vinavant. Questas finamiras sa basan sin il program da la regenza ch’è vegnì elavurà a pli lunga vista, numnadamain dal 2025 enfin il 2028. La revisiun da la lescha da taglia è per exempel vegnida approvada l’onn passà dal Cussegl grond, dapi il 2026 è questa en vigur. Che famiglias e pèrs cun duas pajas vegnan distgargiadas vegn il chantun a sentir tar las entradas d’impostas.
Sper questa lescha chantunala da taglia sa fatschenta il Departament da finanzas e vischnancas l’onn 2026 era cun la realisaziun da la strategia da persunal 2024-2028 che la regenza ha deliberà il 2024. Questa lavur vegn fatga tar il departament dal president da la regenza Martin Bühler. Ultra da quai vegnan era a fatschentar decisiuns naziunalas cun consequenzas per il chantun - per exempel la votaziun da la taglia individuala il mars.
Carmelia Maissen e ses Departement d'infrastructura, energia e mobilitad vegnan il 2026 a sa fatschentar tranter auter cun ovras idraulicas. Là sto vegnir elavurà la basa per liquidar returns d'implants a las vischnancas da concessiun, pia reglar las concessiuns. En ils proxims 16 onns scrodan numnadamain pliras concessiuns en il Grischun. Là èsi da reglar, cun tge cundiziuns che la concessiun vegn prolungada, ubain las modalitads ch'il return a tschep vegnis reglà. Concret: quants pertschients che las vischnancas, quant il chantun e quant ils privats surpiglian. L’onn 2026 duessan avair lieu discurs e vegnir fatg in manual per las vischnancas, a las qualas las ovras giessan suenter che las concessiuns èn scrudadas, l'uschenumnà «Heimfall», sch'i na dat nagina cunvegna.
Ultra da quai vegnan realisadas ils emprims pass da la strategia per il traffic betg motorisà il 2037.
Il «Model directiv concernent l'organisaziun dal provediment da la sanadad en il chantun Grischun» duess vegnir surlavurà enfin l’entschatta da la stad 2026. Quel duess alura esser la basa per la planisaziun d’ospitals. Pia per decider, tge ospital ch'ha da surpigliar tge incumbensa.
En stretg connex stat la revisiun parziala da la lescha davart ils Servetschs psichiatrics dal Grischun. Las experientschas en la Val dal Rain da Cuira cun la purschida da l'intervenziun ambulanta en cas da crisa han mussà ch'igl è pussaivel da smesar las entradas staziunaras en favur da tractaments ambulants. Uschia pon las persunas far part pli ditg a la vita sociala.
En il Departament da giustia, segirezza e sanadad da Peter Peyer è suenter ils eveniments dals davos onns a Bondo, Moesa e Brinzauls la protecziun da la populaziun sin l’agenda. La lescha revedida è en vigur dapi l’entschatta 2026.
Cun ina nova lescha davart la furmaziun professiunala superiura vul la regenza rinforzar la furmaziun. Questa duess era en l'avegnir restar flexibla ed orientada al futur. I duessan vegnir stgaffidas novas premissas per la finanziaziun e per la creschientscha da las purschidas da furmaziun. La proposta duess vegnir discutada en la sessiun d’avrigl 2026 en il Cussegl grond. Sper quai duessan era vegnir preschentadas recumandaziuns per las structuras futuras da las purschidas transitoricas e da las scolas professiunalas spezialisadas.
Era il 2026 vegn il «Plan d'acziun Green Deal» ad esser tema tar il Departament d’educaziun, cultura e protecziun da l’ambient. Quai cun la segunda etappa dal Green Deal. La finamira da quest plan ch’è vegnì inizià il 2019 dal Cussegl grond è, ch’il chantun Grischun è neutral al clima enfin l’onn 2050.
L’onn passà ha il Cussegl grond approvà la lescha davart la promoziun d'abitaziuns che vegn uss introducida. La promoziun prevesa in sustegn da 40 enfin 50 milliuns francs en ils proxims 10 onns per cumbatter la mancanza dal spazi d’abitar. Cun quest instrument bajegia il chantun e concret il Departament d'economia publica e fatgs socials ora la promoziun ch'i deva gia cun il sustegn per il territori da muntogna.
En pli vul il chantun dar in segn encunter la violenza a chasa cun discutar e deliberar la lescha cunter violenza a chasa. Quest tema duess esser sin la maisa dal Cussegl grond en il decurs da la segunda mesadad dal 2026.