Sin dumonda dal schurnal regiunal da SRF ha il manader da l'Uffizi da militar e da protecziun civila Grischun declerà ch'els han trais finamiras cun la nova campagna da reclama. Els vulan per ina gudagnar persunas che vulan daventar part dal cader da la protecziun civila. Sper quai vulan ins era sa drizzar envers ils patruns da lavur da persunas en la protecziun civila, per survegnir dapli encletga. La terza finamira è la visibilitad da la protecziun civila tar la populaziun.
Cun las collavuraziuns cun sportists sco Nino Schurter, Dario Cologna u era Nevin Galmarini muss'ins era ch'ins è preschents a diversas occurrenzas da sport. Ils sportist fan quella collavuraziun gratuitamain, quai è tenor il manader d'uffizi ina bella stima.
Cun ils videos pudain nus mussar che nossa lavur vegn stimada dals sportists.
Per Dominik Schwizer da la FHGR sa tschenta la dumonda, quant effectiv che quests videos èn lura propi. Per l'ina vegnan ins partì en tar il servetsch da protecziun civila sch'ins na po betg far il militar e per l'autra faschess tenor el in video che mussa la lavur concreta dapli senn che in sportist che va cun il velo sin l'areal da la protecziun civila. Tuttina manegia el ch'igl è ludaivel che la protecziun civila dal Grischun veglia far insatge per daventar pli visibels. Sche quai porta lura insatge, mussia il temp.
