Mobing, stress da scola, violenza a chasa – adina dapli uffants e giuvenils èn malsauns psichicamain. Dapi radund quatter mais è la nova clinica Waldhaus da la psichiatria d'uffants e giuvenils dal Grischun a Cuira en funcziun. Daditg è ella pli che plaina.
Na avunda plazzas malgrà grondas investiziuns
La purschida da plazzas na tanscha vinavant betg. Schebain ch'igl è vegnì creà per 50 milliuns francs in implant en il verd che porscha 21 plazzas staziunaras e set plazzas en la clinica dal di – inclusiv cas d'urgenza.
Quai ch'è il trend en l'entira Svizra sa mussa er a Cuira: I dat adina dapli uffants che dovran l'agid. Pertutgadas èn era lur famiglias. Pretendida è l'assistenza staziunara e surtut er l'assistenza ambulanta.
Malgrà dapli collavuraturs, malgrà optimaziun da process, malgrà anc adina dapli tempo ed effizienza èn per part fin 100 persunas sin la glista da spetgar per tractaments ambulants.
La directura medicala da la psichiatria d'uffants e giuvenils dals Servetschs psichiatrics dal Grischun Heidi Eckrich di: «Malgrà dapli collavuraturs, malgrà optimaziun da process, malgrà anc adina dapli tempo ed effizienza èn per part fin 100 persunas da spetga sin la glista per tractaments ambulants.»
I vegnia empruvà da valitar: cas «urgents» avant «mesaun urgents» fin ad insatge che po «era spetgar in zic».
«Nus lavurain quantitativamain vi dal limit», di Heidi Eckrich. «Qualitativamain faschain nus tuttina fitg buna lavur vi da las singulas pazientas e pazients.»
Las raschuns daco ch'uffants e giuvenils crodan en ina crisa psichica èn multifaras. Els pateschan da situaziuns dal mintgadi, per part colliadas cun temas u patratgs da suicidi. Perquai saja impurtant ch'en la clinica na vegnia il social betg a la curta.
«Grazia a Dieu giogan era nossas collavuraturas e collavuraturs gugent», di la directura Heidi Eckrich cun vista sin il local da segiurn che envida da giugar. Tar il nov cumplex d'edifizis da la clinica Waldhaus tutga er ina scola. Là vegn instruì durant il mez di, senza squitsch e senza examens.
Heidi Eckrich è dapi set onns directura medicala da la psichiatria d'uffants e giuvenils dals Servetschs psichiatrics dal Grischun. Ella è persvasa: «Nus stuain metter anc bler dapli paisa sin buna lavur da prevenziun.»
Tenor mai datti perditga da fermezza dad ir per agid, era sch'i na vegn betg vesì uschia dal mund
Ina giuvna pertutgada formulescha quai uschia: «Savens vegn clamà per agid sco fitg flaivel. Ma tenor mes avis dat quai perditga da fermezza, er sch'el na vegn betg vesì uschia dal mund uschia.»
Ina disponibladad 24/7, tuttina betg avunda capacitad
La nova psichiatria d'uffants e giuvenils da la clinica Waldhaus ha ina disponibladad permanenta, in manaschi 24 uras al di e 365 dis l'onn. Ella duai tegnair quint dal svilup e crear capacitads supplementaras urgentamain necessarias en la regiun. La purschida cumpiglia ina staziun d'uffants, ina da giuvenils sco era ina da psicoterapia. Perquai che grevezzas psichicas cumparan pli baud ed ils maletgs da la malsogna daventian adina pli cumplexs.