Il quint annual surpassa cun in gudogn da 12,5 milliuns francs las directivas dal preventiv. A medem temp sa mussa la citad precauta en connex cun las investiziuns ed augmenta ses grad d'atgna finanziaziun.
Il quint economic 2025 da la citad da Cuira sa preschenta sco ordvart positiv cun in gudogn da 12,5 milliuns francs. Il gudogn è 7 milliuns francs pli aut ch'il preventiv e 2,5 milliuns francs pli aut ch'il resultat da l'onn precedent.
Cun in retgav da 317,8 milliuns francs ed expensas da 305,3 milliuns francs n'ha la citad betg mo pudì tegnair sias expensas per 5,2 milliuns francs sut las valurs previsas, mabain era puncts pli auts.
En spezial il retgav finanzial ha surpassà las aspectativas per 5,4 milliuns francs. Autras posiziuns d'entradas, sco bunificaziuns e retgavs da transfer, èn medemamain stadas sur las finamiras dal preventiv, entant ch'il retgav fiscal è restà per 2,1 milliuns francs sut las aspectativas.
Investiziuns sut il nivel budgetà
Las investiziuns nettas han importà 35,4 milliuns francs ed èn stadas uschia sut la summa budgetada oriundamain da 51,7 milliuns francs. Il president da la citad da Cuira, Hans Martin Meuli declera ch'intgins projects èn vegnì spustads ed èn uschia betg da vesair en il quint. In exempel saja la scola da Masans ch'era budgetada cun 4,2 milliuns francs ch'ins ha alura betg duvrà. Questa retegnientscha tar las investiziuns ha chaschunà in aut grad d'atgna finanziaziun da 68%. Tar ils projects d'investiziun ils pli gronds da l'onn èn stads:
- l'implant da scola e sport Fortuna (15 milliuns francs)
- la staziun da Cuira vest (5,8 milliuns francs)
- la participaziun ed ils emprests da daners als manaschis industrials da Cuira (5 milliuns francs).
Quests trais projects han fatg ora ensemen 73% da las investiziuns nettas.
Il grad d'atgna finanziaziun effectiv ha muntà a 68% ed è uschia cleramain sur las aspectativas. En la planisaziun dal preventiv per l'onn 2025 eran previs be 34%. L'onn precedent ha il grad d'atgna finanziaziun muntà bun 29%, uschia che l'atgna finanziaziun da la citad è anc ina giada sa meglierada considerablamain. Dentant saja quest grad d’autofinanziaziun anc adina memia bass. La finamira è da vegnir sin 80% a partir dal 2030. Quai munta che la citad po finanziar la gronda part da las investiziuns planisadas ord l'atgna bursa e betg cun chapital ester.
Malgrà in deficit resta la situaziun finanziala stabila
Da la vart passiva ha la citad pudì augmentar ses agen chapital per 16,8 milliuns francs. La quota d'agen chapital è s'augmentada sin 60% – ina valur che surpassa cleramain la quota minimala da 55% ch'è vegnida fixada en il rom da la planisaziun da plirs onns.
Il medem mument è il chapital ester s'augmentà per 60,8 milliuns francs, quai che resulta oravant tut da l'activitad d'investiziun. Malgrà in deficit da finanziaziun dad 11,5 milliuns francs resta la situaziun finanziala stabila.