Avant 10 onns ha la regenza grischuna lantschà il «Program da cooperaziun per il turissem grischun». Questa iniziativa per promover la cooperaziun tranter ils acturs turistics e l'innovaziun, scada la fin da l'onn 2023. La finamira dal program eri da rinforzar l'interacziun tranter ils differents furniturs da prestaziuns e da promover la forza innovativa da las destinaziuns, da render cumpetitivs lur products e da plazzar uschia il Grischun sin ina posiziun prominenta en ils conturns turistics naziunals ed internaziunals. Cun il program han ins pudì sustegnair passa 70 projects cun in volumen da promoziun da 15,5 milliuns francs.
Il Cussegl turistic dal Grischun vegn schlià
Il Cussegl turistic dal Grischun è vegnì stgaffì per gestiunar strategicamain il program sco gremi independent per cussegliar la regenza grischuna. Cun la fin dal program vegn era quest cussegl dad otg persunas schlià.
Agid d'orientaziun per il turissem grischun
L'«Analisa da la situaziun per il turissem grischun» ch'il Cussegl turistic ha ussa preschentà, mussa schanzas e privels per il turissem grischun e serva sco agid d'orientaziun. En la publicaziun vegnan skizzads ils champs d'acziun impurtants e trends sco era formuladas recumandaziuns d'agir. Grazia a sia diversitad da la purschida e grazia a la gronda surfatscha dal chantun, ha il turissem grischun avantatgs economics substanzials che ston er en l'avegnir vegnir tratgs a niz cun cleras finamiras, scriva la regenza en ina communicaziun.
Instruments da promoziun per il turissem restan disponibels
Suenter la terminaziun dal Program da turissem dal Grischun 2014–2023 metta il chantun era vinavant a disposiziun instruments da promoziun concrets. En spezial il proxim program da realisaziun da la Nova politica regiunala (NPR) dal chantun Grischun. Quella prevesa differents champs tematics, uschia ch'igl è era vinavant pussaivel da promover projects innovativs e projects d'acturs turistics che cumpiglian pliras destinaziuns cun contribuziuns chantunalas.
Or da l'archiv:
