Siglir tar il cuntegn

Header

audio
Chasas da tgira: Memia blera politica en la suprastanza e gremis strategics?
Or da Actualitad dals 01.02.2024. Maletg: RTR
laschar ir. Durada: 5 minutas 49 Secundas.
cuntegn

Renfatscha: «Fratelli, amici» Quanta politica sa chatta en las chasas d'attempads?

L'emna passada ha RTR raportà davart renfatschas envers la direcziun da la Casa s. Martin a Trun. Ina da quellas: pliras persunas sajan mo pervia da colliaziuns e politica vegnidas tar lur posts. In sguard sur il chantun mussa: Las vischnancas èn savens involvidas. Uschè simpel n'èsi dentant betg.

Pliras furmas d'organisaziun

En il chantun Grischun datti 52 chasas d'attempads. Quellas èn repartidas sin 17 regiuns che na correspundan betg dapertut a las 12 regiuns dals ospitals. En bleras regiuns datti dentant ina organisaziun tetgala che ha la gronda part da las instituziuns da sanadad sut ses tetg.

Ina chasa d'attempads po s'organisar sco ch'ella vul – pia sco uniun, societad cooperativa u ina fundaziun. Tge ch'è dentant il pli savens il cas, è che las vischnancas èn las incumbensadras e surdattan il mandat per manar la chasa da tgira. En il gremi, la suprastanza, dad ina fundaziun per exempel n'èsi betg nunusità ch'ina persuna or da la politica sesa.

En il cas ideal saja il gremi che maina strategicamain ina chasa d'attempads divers. Quai di Reto Loepfe, il president da la Federaziun grischuna d'ospitals e chasas da tgira. Las persunas duessan avair savida en differents secturs – insatgi forsa en la politica, insatgi da manar, insatgi da la tgira, insatgi da finanzas ed uschia vinavant.

Gremis strategics: naginas prescripziuns davart cumpetenzas

Ch'i vegnan fatgas ponderaziuns tge satgados da savida che las persunas en il gremi strategic d'ina chasa d'attempads han, n'è nagut da nov. En la refurma da la lescha da tgira che vala dapi il 2021 era l'idea oriunda da prescriver tge cumpetenzas ch'i dovria en quest gremi. Dentant en la consultaziun en connex cun la refurma era la maioritad da quels e quellas ch'han prendì posiziun da l'avis che quai saja cumbinà cun custs supplementars e ch'i saja uschia grev da chattar persunas per quests posts. Perquai n'ha quest punct betg dumagnà en la lescha da tgira.

Mainachasa ston ademplir tschertas premissas

Per il u la manadra d'ina chasa d'attempads datti tschertas premissas ch'el u ella sto ademplir. Quellas prescriva il chantun. La persuna dovra ina scolaziun sco manadra d'instituziun u ina scolaziun da management cumparegliabla. Latiers dovri savida en la scienza da vegliadetgna. Persunas che n'han betg la savida prescritta ston prender suenter quella cun visitar in curs. La persuna ha peda dus onns a partir da l'engaschament per far quai.

Era per la persuna che maina la tgira datti prescripziuns. Quella sto esser dal fatg e avair terminà scolaziuns. Pia betg mintgin e mintgina po manar ina chasa da tgira. Il chantun controllescha che tschertas premissas èn ademplidas. Sch'ina persuna na fa dentant betg endretg sia lavur lura ha il gremi strategic da controllar e sche necessari d'intervegnir.

RTR actualitad 07:00

Artitgels legids il pli savens