- Il november èn tschintg aspirants da polizia vegnids dispensads da lur corps pervi dad incidents da rassissem e sexissem a la scola da polizia, tranter quels dus aspirants da la Polizia chantunala grischuna.
- Ils corps da polizia chantunals da Son Gagl e Turgovia sco era il corps da la citad da Son Gagl han relaschà lur aspirants per immediat.
- La Polizia chantunala grischuna na vesa nagin motiv da relaschar ils aspirants dispensads.
«Inculpaziuns betg fundadas» di il cumandant da polizia
Bun duas emnas suenter ch'ils cas èn vegnids publics ha il cumandant da la Polizia chantunala grischuna, Walter Schlegel prendì posiziun e declerà daco ch'ils dus aspirants grischuns dastgan restar tar la polizia, cuntrari als auters trais aspirants. Mo sin basa dal rapport n'hajan ins betg pudì decider, perquai hai dà scleriments e quels hajan mussà ch'ils inculpads na sajan nagins rassists e ch'i na saja er betg da constatar posiziuns rassisticas. Perquai sajan las renfatschas betg fundadas. I dettia dus motivs daco ch'ins saja vegnì a questa conclusiun.
Per l'ina na constat il temp betg – quella giada n'era la persuna gnanc a la scola da polizia ad Amriswil. Per l'autra saja las remartgas uschè pauc concretas ch'ins na possia betg giuditgar sche quellas èn rassisticas.
Plinavant di Walter Schlegel che tut ils tschintg cas sajan differents e perquai vegnian quels er tractads different. Mintga singul corp decida sch'i dat consequenzas dal dretg da persunal. D'in auter avis è il president dad Ostpol, Jürg Zingg stà al cumenzament da l'emna. Per ina reacziun sin las explicaziuns dal cumandant da polizia dal Grischun è el però betg stà cuntanschibel.
Ostpol è d'in auter avis
Avant bun duas emnas ha la conferenza dals cumandants dal concordat da polizia da la Svizra Orientala Ostpol annunzià, che tschintg aspirants da polizia sajan vegnids dispensads da lur corps pervi da remartgas rassisticas e sexisticas a la scola da polizia ad Amriswil en il chantun Turgovia.
Ils en tut tschintg aspirants hajan cuntrafatg a l'urden da la scola da polizia ed al codex europeic d'etica da polizia. Uschia ha il concordat da polizia da la Svizra Orientala infurmà ils 19 da november. Els duain avair derasà cuntegns respectivs en regiuns «nun-publicas» da la scola da polizia. En tge furma e dimensiun n'è betg enconuschent.
I haja dà expressiuns discriminantas concretas che na sajan betg tolerablas per policists, ha ditg il president dad Ostpol, Jürg Zingg, da lez temp a radio SRF. Perquai che l'entir cas n'è betg capità en il spazi public n'ha quai dà nagina procedura penala. Tuttina han ils corps pertutgads, las polizias chantunalas da Turgovia e Son Gagl, sco era la polizia da la citad da Son Gagl, decidì da relaschar lur aspirants.
Daco salva la Polizia chantunala grischuna ses dus aspirants?
Auter la Polizia chantunala dal Grischun. Suenter ina examinaziun sajan ins vegnì a la conclusiun, ch'i na dettia nagins motivs ina relaschada, hai num sin dumonda da SRF. «Ils dus aspirants han en il fratemp decidì d'interrumper la scolaziun ad Amriswil», scriva il post da medias da la Polizia chantunala. Per il corps saja il cas cun quai liquidà. Tge che capitia exact cun ils aspirants lascha la polizia dentant avert, malgrà pliras giadas dumandar.
En ina infurmaziun interna als collavuraturs tar l'incident, ch'è a disposiziun ad SRF, trametta la Polizia chantunala la medema communicaziun sco vers anora – dentant cun ina construcziun supplementara: «Eine interne Weiterbeschäftigung wird derzeit geprüft.» Questa part manca sin la posiziun externa. La Polizia chantunala na prenda betg posiziun en chaussa.
A la scola valia toleranza nulla, aveva ditg il president dad Ostpol a chaschun da la dispensaziun. Daco che la Polizia chantunala dal Grischun examinescha uss da salvar ils dus aspirants en il corps, resta avert. La Polizia chantunala na dat naginas ulteriuras infurmaziuns cun renviament a la protecziun da la persuna.