Suenter in incap nunspetgà ha il territori da skis Minschuns en Val Müstair stuì serrar il favrer la gronda part dal territori d’in di a l’auter. Quai pervia d’in donn da rodam vi dal runal principal che collia la Val cun la regiun da skis. Malgrà ina sperta pustaziun dals tocs da reserva, èn quels pir arrrivads avant paucs dis. Tocs da pendicularas derivan numnadamain da l’Ucraina e causa la guerra datti retards da furniziun. Sco Daniel Pitsch, il mainagestiun da Minschuns di, saja almain la chareschia stada survesibla.
Nagina stagiun da stad per Grüsch-Danusa
Tar las pendicularas Grüsch-Danusa n'hai dà nagin incap nunspetgà, sin il program è però stada ina revisiun da las pendicularas. Er là sajan ins stads dependents da tocs da reserva da l'Ucraina, uschia Andri Schmellentin, il directur da las pendicularas Grüsch-Danusa. Il temp intschert haja fatg suar ils responsabels. Ils tocs èn però arrivads en omaduas regiuns da skis a temp. Uschia ch'omaduas regiuns èn prontas per l'enviern.
Sursaissa ha interrut la stagiun da stad
Curt suenter il cumenzament da la stagiun da stad han ils responsabels da las pendicularas Sursaissa/Mundaun constatà che la transmissiun da la sutgera da Cuolm Sura – Mundaun perdeva ieli. La reparatura necessaria è vegnida organisada da la firma Garaventa ed exequida en Germania. Tenor il mainafatschenta Markus Good sajan ins en l'urari: La transmissiun revedida turna mez november a Cuolm Sura e po alura puspè vegnir montada. Sin l'entschatta december duess la sutgera esser en funcziun uschè che tut è pront per il cumenzament da la stagiun d'enviern.