La citad fixescha tranter auter nua e co ch'i dastgà vegnì construì, tge ch'è da proteger e nua che las zonas da recreaziun èn. Cun reveder l'urden fundamental adattescha la citad da Cuira leschas da construcziun e basas da planisaziun ch'èn veglias e betg unifitgadas a dretg ordinà e las pretensiuns d'ozendi. Finamira è da stgaffir segirezza da planisaziun a lunga vista per la publicitad ed investurs privats.
En dialog cun abitantas ed abitants
L'urden fundamental influenzescha la vita urbana en divers secturs, uschia per exempel puncto mobilitad, abitar, lavur e temp liber. Per ch'er la populaziun haja pled en chapitel ha la citad da Cuira envidà ad ina occurrenza d'infurmaziun, plinavant pon abitantas ed abitans far part da lavuratoris e scriver propostas sin ina plattafurma online.
Cunzunt la dumonda da la construcziun en la citad ha occupà las persunas preschentas, uschia per exempel il punct quant spess ch'ins po construir ubain er il mantegniment dal character da la citad e sias fracziuns.
Nus avain da construir pli spess ma er stgaffir zonas verdas da recreaziun. Nus essan dumandads da purtar bunas soluziuns.
La citad da Cuira cun il suprastant responsabel Simon Gredig è persvas ch'ins chattia bunas soluziuns. Sper per exempel la construcziun d'ina chasa auta sajan ins er obligà da stgaffir ina zona verda, realisar ina plazza da gieus u ina pussaivladad d'inscunter. Ina ulteriura sfida saja er da chattar in urden che sa cunvegn cun la construcziun en la citad da Cuira ma er en ils vitgs fusiunads. La finala saja impurtant da definir tut ils puncts impurtants ma er laschar in tschert spazi per reglar ordaifer la lescha.