Parlament da Cuira - A Cuira duai dar dapli abitaziuns pajablas

La maioritad burgaisa ha era tar la dumonda dal spazi d'abitar pajabel gì en maun la decisiun. Suenter lungas discussiuns durant la seduta dal parlament è vegnì decidì che la populaziun da Cuira po decider tranter duas propostas:

• L'iniziativa da la PS pretendan che la citad duai stgaffir entaifer dus onns las premissas per ch'in terz da la surfatscha d'abitar construì mintg'onn da nov vegnia dada en locaziun per ils custs ch'èn effectivamain resultads tar la construcziun. Era l'associaziun da locatarias e locataris dal Grischun, ina cuminanza d'interess e cooperativas per la construcziun d'abitaziuns sustegnan l'iniziativa.
• La PPS, il Center e la PLD proponan che la prescripziun d'in terz duaja valair exclusivamain sin terren communal. Per persunas privatas na duai questa prescripziun betg valair. Là vul l'allianza animar cun impuls da construir.

Diskutieren Sie mit:

Era sche la Partida socialdemocratica fiss stada pronta da far intgins cumpromiss per suenter trair enavos lur iniziativa – n'è quai betg succedì.

Las opiniuns da la vart burgaisa e da la vart sanestra van memia fitg dapart. In punct dispità è sche era las abitaziuns da persunas privatas duessan vegnir inclusas en questa calculaziun. Tenor il parlamentari Vincenzo Cangemi da la PS è quai necessari per che questa iniziativa avess in effect. Da mo quintar las abitaziuns sin terren agen da la citad excluda tut las autras abitaziuns.

Per Tino Schneider, parlamentari dal Center èsi impurtant ch'abitaziuns privatas na vegnan betg resguardadas en questa calculaziun.

L'iniziativa saja per el, per las partidas burgaisas ed era per la suprastanza da la citad memia ambiziusa. L'allianza burgaisa vul che persunas privatas duessan vegnir motivadas cun stimuls da bajegiar – per exempel cun la pussaivladad da bajegiar sin in territori pli grond.

La populaziun da Cuira decida il settember davart questas duas propostas a l'urna.