L'investur ed impressari tessinais Stefano Artioli ha gronds plans per San Bernardino. El vul renovar bajetgs existents, bajegiar novs hotels ed era las pendicularas e l'ustaria en il territori da skis Confin ha el cumprà. San Bernardino dess vegnir ina destinaziun che ha avert tut l'onn.
Nov schlantsch
La reavertura dal territori da skis quest enviern portia nov schlantsch per la regiun, di il directur da l'organisaziun turistica da la regiun Christian Vigne. La reavertura saja ina miracla e da quella possian tuts profitar. Il territori da skis haja quest enviern carmalà ina massa glieud cun mirveglias a San Bernardino. Er hajan els schon uss dumondas per la stad, di Christian Vigne, che lavura gia passa 15 onns en il sectur da turissem da la regiun.
Il hotelier Hans Peter Wellig è creschì si a San Bernardino e maina dapi 40 onns l'hotel Bellevue. Cun la reavertura dal territori da skis saja baintant sa midà. Blera glieud saja vegnida quest enviern a San Bernardino per guardar, cudeschà hajan tenor el dentant paucs. Quai saja era chapaivel, cunquai ch'il territori da skis saja vegnì avert en fitg curta vista.
Senza manaschi da skis n'eran ils envierns a San Bernardino nagins endretgs envierns.
Ditg na saja betg stà cler, sch'i possian insumma gia avrir quest enviern. Il svilup actual fa zunt plaschair a Hans Peter Wellig. Dal nov schlantsch e dal svilup a San Bernardino profiteschian tuts. Ins possia senz'auter dir che quai saja l'emprim pass enavos tar ils «temps dad aur» a San Bernardino.
Jau sun intgantà dal svilup, ussa vegni puspè betg mo bun mabain fitg bun.
Sveglià or da la sien da Rosaspina
In che passenta gia 10 onns sias vacanzas cun la famiglia a San Bernardino è Giorgio Fonio da Chiasso. El saja s'inamurà immediatamain en il lieu. El possia tschentar giu bain qua e giudair la natira. Cun la reavertura dal territori da skis saja la purschida sa midada e l'atmosfera saja entusiastica. Quai saja fitg positiv per la vischnanca e per il turissem.
Sin visita a San Bernardino eran Annagelgia Joos dad Andeer e Leonhard Nicca da Donat. Il svilup a San Bernardino haja sveglià lur interess. Il svilup actual da San Bernardino e las investiziuns sajan positivas, di Leonhard Nicca. Da quel possian era Spleia, la Valragn e la Val Schons profitar.
I para che San Bernardino vegnia uss sveglià or da la sien da Rosaspina.
