La svizra haja in boom sco destinaziun da stad ha SRF rapportà dacurt. Cifras da l'Uffizi federal da statistica conferman quai. Il 2025 hai dà en Svizra per la tschintgavla giada in augment da pernottaziuns tranter matg ed october: cun radund 25 milliuns pernottaziuns hai dà in nov record.
Betg nov ma auter
Da scappar da la chalira e far vacanzas en regiuns muntagnards na saja betg insatge nov, declera Martin Vincenz, schef da Grischun Vacanzas. El conferma dentant in trend actual, nua che viadis en las muntognas cumenzan pli baud.
Cun las temperaturas actualas èn las destinaziuns grischunas questa stagiun pli dumandadas dals giasts.
«Coolcation» descriva la branscha da turissem il far vacanzas en in lieu pli frestg e vesa en quellas ina gronda schanza: dapli vacanzas da stad en destinaziuns svizras durant che las vacanzas a la mar vegnian fatgas durant auters temps.
Ina campagna concreta per attrair giasts en ils auts ha Arosa realisà. Il messadi principal: tar nus èsi pli agreabel. Sche per far vacanzas u per lavurar laschian ins cunscientamain davent, declera Roland Schuler, directur da turissem d'Arosa. Durant ils dis chauds dettia numnadamain era dapli persunas che spostian il homeoffice en lieus pli frestgs
En futur vegni a dar damain manaschi stagiunal e dapli strategias da turissem da 10 enfin 11 mais.
«Workation» è in auter term modern da la branscha che descriva concret la lavur d'in lieu nua ch'ins po era far vacanzas. Quasi in biro ordaifer da chasa. Durant che «workation» sa laschia observar sco fenomen en destinaziuns grischunas, dentant senza statisticas concretas, causa ch'ella na vegn betg mo fatga en hotels, è la «coolcation» in trend pli concret cun in'influenza reala. Ad ina pli gronda dumonda stoppia numnadamain seguir ina pli gronda purschida, èn Martin Vincenz e Roland Schuler perina. Ed uschia prognostitgeschan ils experts en futur in manaschi main stagiunal e cun ina purschida pli vasta e lunga.
