Da las 409'000 pernottaziuns derivan 319'000 da la stagiun da stad e 90'000 da la stagiun d'enviern. Che quest resultat è gartegià, malgrà che set chamonas èn stadas serrads, mussa tenor il Club alpin svizzer che las chamonas sajan vinavant fitg tschertgadas. Cunzunt la stagiun d'enviern saja sa sviluppada fermamain cun in plus da bunamain 26% cumpareglià cun l'onn avant.
Vallais il pli popular per ir sin chamona – Grischun suonda sin plazza dus
Las chamonas en il Vallais èn stadas las pli frequentadas cun bunamain 120'000 pernottaziuns, suandadas dal Grischun cun stgars 85'000 pernottaziuns. La chamona la pli visitada è puspè stada la Lämmerenhütte en il Vallais, en il Grischun era quai la chamona da Maighels.
Sfidas e problems restan malgrà la stagiun da record
Fin l'onn 2040 quinta il CAS però cun investiziuns da fin 25 milliuns francs ad onn per mantegnair las 151 chamonas. Bun in terz da questas expensas dovria pervi da las consequenzas da la midada dal clima: da schelira permanenta che sdreglia sur cundiziuns meteorologicas adina pli extremas fin al provediment d'aua che daventia er adina pli pretensius da garantir.