En il Grischun èn mortas l’onn passà 12 persunas tar accidents en la muntogna – prest la mesadad da l'onn avant. Quai resulta da las cifras actualas ch’il Club alpin svizzer ha communitgà.
En l’entira Svizra sajan 98 persunas sa disgraziadas mortalmain. Quai sajan uschè paucas sco dapi diesch onns betg pli. Dentant sajan las forzas da salvament stadas l’onn passà bunamain 4'000 giadas en acziun, pli savens ch’ils onns precedents. Ils pli blers cas d’urgenza, numnadamain bunamain la mesadad, hai dà cun viandar.
En tut hajan ins spendrà radund 11% dapli persunas ch'en la media dals onns 2020 fin 2024. Il 2025 sajan stadas da viadi fitg bleras persunas en las muntognas. Quai mussian las cifras da record tar las pernottaziuns en tegias dal SAC. Quai possia esser in motiv per l'augment da salvaments.
Adina dapli acziuns per persunas betg blessadas
En ils davos onns èn s'augmentadas las acziuns per spendrar persunas che n'èn betg blessadas. Il 2020 eran bunamain 3 da 10 persunas spendradas betg blessadas. Il 2025 eran quai gist 4 da 10 persunas. 84% da quellas persunas èn stadas bloccadas – quai vul dir ch'ellas na pudevan betg terminar lur activitad or d'atgna forza – saja quai cun cuntinuar u returnar.
Per il Club alpin svizzer n'èsi betg cler daco ch'igl ha dà quest augment. Ina pussaivladad saja che la rait da telecommunicaziun vegnia adina meglra ed ins possia tras quai pli spert e simpel clamar agid. Era lavurian ils servetschs da salvament adina meglier ensemen e sajan organisads pli e pli professiunal – tras quai vegnian persunas salvadas pli spert, pia era avant ch'ellas possian sa blessar.
Tenor il SAC saja dentant era pussaivel ch'adina dapli persunas na planiseschian betg avunda lur turas u ch'ellas sutstimian quella.
Il dumber d'acziuns da salvament sa reducescha en temps da trid'aura perquai che pli paucas persunas èn da viadi. Uschia sa mussa er ina reducziun durant il fanadur 2025 ch'è stà marcà da blera plievgia. Cun excepziun dal fanadur è il dumber da cas d'urgenza – en cumparegliaziun cun l'onn precedent – s'augmentà ils mais da mars fin october.