L’uniun Graubündenmusik è vegni fundada l’onn 2019 cun il sustegn da la Banca Chantunala Grischuna. Suenter è ella vegnida finanziada tras contribuziuns da commembers, fundaziuns, vischnancas e dal chantun.
L’uniun ha per exempel organisà inscunters tranter musicistas e musicists, differents workshops u er accumpagnà bands cun registrar chanzuns. Profità da questas offertas han enturn 300 musicistas e musicists.
Jau hai chattà mes manager tras Graubündenmusik ed hai chattà autras persunas che lavuran ussa anc cun mai ensemen. Jau hai gì differents discurs persunals era davart la tecnica.
Betg be musicistas e musicists han profità da Graubündenmusik. L’uniun sezza ha era gidà d'organisar e realisar events. Enturn 40 events èn vegnids realisads.
Tras sia pagina d’internet graubündenmusik.ch eri per persunas ch'organiseschan concerts e festivals simpel da chattar musicistas e musicists da la regiun per lur events. Quai vegn ussa ad esser in pau pli grev.
Las consequenzas èn che nus n'avain betg pli quellas persunas da contact. Nus n'avain betg pli la pagina d'internet nua ch'eran si tut ils acts dal Grischun. Nus na pudain betg pli s'orientar uschè bain e guardar tge per bands che stattan a disposiziun.
Graubündenmusik scriva en ina communicaziun, ch'i saja vegnì adina pli grev da chattar avunda persunal e sustegn d’uffizi d’onur per pudair garantir il manaschi da l’uniun a lunga vista.
Malgrà ch'i saja donn ch'i na dat betg pli l’uniun, èn las persunas pertutgadas persvasas ch'i va er vinavant senza il sustegn da Graubündenmusik.
Cun quai che quell'uniun chala si ussa, vegni segir a dar pli paucs inputs per l'entira branscha da musica dal Grischun, dentant l'entira musica vegn tuttina a viver vinavant. L'entira uniun n'è betg stada responsabla per la qualitad da la musica grischuna. I va er vinavant senz'ella, en mintga cas.
Ins sto ussa simplamain s'organisar da nov. E quai probablamain cun in pau dapli sforz.