L'onn 2007 ha Sandro Dietrich cuntanschì il 7avel plaz tar la concurrenza da musica svizra Music Star. E malgrà ch'el ha dapi lura era gia edì intginas atgnas chanzuns, ha el chattà sia gronda passiun en la producziun da musica. En siu studio Tonraum en la citad veglia da Cuira passenta Sandro Dietrich bler da ses temp. E dapi mez onn experimentescha el era cun l'intelligenza artificiala.
L'intelligenza artifiziala è mes coproducent en il studio. Enstagl ch'insatgi ma propona d’integrar il tun d’ina ghitarra en la chanzun, fa la IA quella proposta.
I saja impurtant ch'ins dovria sper la IA era anc ses agen chau e sia atgna creativitad. Bain sajan ils programs sa meglierads fermamain ils davos onns e sajan in bun med per crear texts, maletgs e musica. Ma senza instruments e vuschs realas na funcziunia tuttina betg. Senza quellas mancassan las emoziuns ed il cor, di l'um oriund da Domat.
Tuttina saja la IA in bun instrument per sa laschar inspirar e per survegnir in'idea, co la nova cumposiziun pudess tunar. Tut tenor pretensiuns «spidia» l'intelligenza artifiziala lura or propostas che tunian da rock, pop, jazz ed uschia vinavant. Entras quai survegnia el ideas ch'el n'avessia uschiglio betg survegnì.
Sch'ins fetschia diever endretg dad ella, haja l'intelligenza artifiziala actualmain strusch dischavantatgs per la producziun da musica, di Sandro Dietrich. Tuttina saja el pertschert ch'ils mastergns creativs, e tar quels tutgia era sia lavur, vegnian a sa midar entras la IA. La finala saja il pli impurtant da duvrar ella sco agid e betg per remplazzar l'atgna creativitad.
Tge din musicistas e musicists grischuns dal diever da l'intelligenza artifiziala?
-
Bild 1 von 4. Paula Mia . «Sche jau dovrel in pled englais che va en rima cun in auter, lura dumond jau mintgatant l'intelligenza artifiziala. Uschiglio na dovr'jau betg ella per mia musica.». Bildquelle: RTR.
-
Bild 2 von 4. Flavia Capello. «Mintgatant dovr'jau la IA sco agid per scriver mes texts. Per exempel, cura che jau less savair la muntada dad in pled u per tschertgar in sinonim.». Bildquelle: RTR.
-
Bild 3 von 4. Mario Pacchioli. «Fatg a maun è auter che cun maschina.». Bildquelle: RTR.
-
Bild 4 von 4. Cinzia. «Jau sun surstada che la IA po crear tocs dad uschè buna qualitad. Ma per mai manca insatge – numnadamain l'olma.». Bildquelle: RTR.
Musica IA: Tgi ha ils dretgs e survegn ils daners?
En Svizra annunzian musicistas e musicists lur chanzuns a la Suisa per survegnir tantiemas mintga giada ch'il toc è dad udir al radio. Ina chanzun tutga tenor ils dretgs d'autur a las persunas che han creà la chanzun: il cumponist, la musicista, la producenta etc. E quai resta era uschia enfin 70 onns suenter la mort.
Chanzuns creadas dal tuttafatg cun IA na pon ins betg proteger e na vegnan era betg acceptadas da la Suisa. Vul dir, ch'i na dat era nagins daners da lezza vart.
Difficil da distinguer da carstgaun e maschina
Ins dastga laschar inspirar da l'intelligenza artifiziala – saja quai per crear la melodia u era il text. Impurtant è dentant che la chanzun na dastga betg esser creada sulettamain cun IA.
Malgrà che la Suisa ha in program che filtrescha chanzuns dad IA, na saja il mument anc betg uschè simpel da distinguer tranter carstgaun e maschina, e tgi che ha ussa creà tge. Tge ch'ins po dentant gia dir ussa: chanzuns creadas da l'intelligenza artifiziala èn ina concurrenza per cumponistas ed auturs: In studi mussa che quels pudessan perder entras quai 4 milliardas euros – e quai mintg'onn.