La polizia chantunala ha survegnì las davosas emnas pliras annunzias da cas che uffants èn vegnids pledentads dad esters. Las davosas emnas èsi stà quatter annunzias. L'onn passà haja dà en cumparegliaziun 10 annunzias da tals cas. Ils cas èn capitads a Scharans, Tusaun ed a Trin. Il cas a Trin è succedì gievgia, ha dentant pudì vegnir sclerì. Ils uffants hajan immediat infurmà il mainascola e lez ils geniturs e la polizia. Ils uffants avevan notà il numer da l'auto. La fin finala era l'um be l'ami d'ina famiglia che tschertgava insatgi.
Tenor il pledader da medias da la polizia chantunala saja l'annunzia da tals cas insatge che capita adina puspè. I na saja per il mument betg alarmant. Tals cas na vegnian betg publitgads da la vart da la polizia, quai per betg far panica.
Nossa finamira è era da betg far panica en il chantun. Nus prendain tuttina fitg serius quels cas. Igl è impurtant ch'ils uffants san co sa cumportar en uschè in cas.
La polizia sensibilisescha adina puspè en las scolas e fa attent ils uffants tge ch'ins po far en uschè ina situaziun. Impurtant saja da dir Na, betg ir cun insanua cun esters e far attent sin sasez sch'els sa sentian en privel. Latiers possia mintga observaziun detagliada dad in tal cas gidar la polizia da sclerir pli spert ils cas.
