La Scola auta da pedagogia dal Grischun (SAPGR) survegn in nov rectur: Reto Givel-Bernhard. Quai ha il cussegl da la scola auta elegì. A partir dal prim da november surpiglia el ses nov uffizi, sco i resulta da la communicaziun. Per il mument è l'um da 50 onns il «pro-rectur scolaziun» a la Scola auta da pedagogia a Cuira, quai dapi bunamain tschintg onns.
A la testa da la Scola auta da pedagogia dal Grischun succeda Reto Givel-Bernhard a Gian-Paolo Curcio. Bun 10 onns è Curcio stà rectur da la SAPGR. A partir dal 2025 surpiglia el lura il post sco rectur tar la FHGR – la Scola auta spezialisada dal Grischun.