Eva-Maria Faber ha influenzà generaziuns da studentas e students, ha dà impuls a debattas teologicas ed era surpiglià responsabladad sco rectura da la scola auta da teologia – e quai sur plirs onns. Quest mais po la dunna da 61 onns festivar ses giubileum da 25 onns.
L’entschatta n'hai jau betg savì metter avant da lavurar sco scienziada. Jau hai vulì far insatge cun carstgauns.
Ma igl è vegni auter. E la clamada sco professura e rectura pussibilitescha ad ella blers contacts cun diversas persunas. Quai saja fitg bel, uschia Eva-Maria Faber. Plinavant plascha ad ella la maschaida da diversas lavurs.
La gronda motivaziun per il studi da teologia
Ella sa fatschentia gugent cun las dumondas sur da la carstgaunadad. Spezialisada è la dunna dad Osnabrück en la Germania en il rom dogmatica. Quai rom sa fatschenta cun dumondas sco per exempel: Tgi è Dieu insumma? U tge exact è la muntada dals sacraments?
Sper la dogmatica ha Eva-Maria Faber era surpiglià il rom da teologia fundamentala. Là giaja plitost per dumondas sco: Daco duess jau insumma crair vi da Dieu? E daco gist vi dal Dieu cristian? Tut dumondas plitost profundas.
La teologia n'ha betg direct las respostas sin questas dumondas. La teologia sco era la religiun pon dentant dar tscherts impuls.
Sfidas durant quels onns
Il medem onn sco Vitus Huonder è daventà uvestg da Cuira, il 2007, è Eva-Maria Faber daventada rectura da la scola auta da teologia. Il temp sut uvestg Vitus Huonder è era stà intensiv. Ina sfida pudess'ins dir.
L’atmosfera en l’entir uvestgieu era fitg pesanta.
Eva-Maria Faber n'ha betg mess il chau en il sablun. Ella ha cun tut sias forzas e ses patratgar positiv empruvà da dar dumogn a questa situaziun: «En grevas situaziuns hai jau il sentiment: ussa pir da dretg.»
In nov vent: Miaivel e bainvulent
Dapi prest quatter onns è Joseph Maria Bonnemain uvestg da Cuira. E cun il nov uvestg ha era l’atmosfera midà. La collavuraziun è fitg bainvulenta e l'uvestg para da stimar la scola auta da teologia qua a Cuira – quai n'era betg il cas avant.
Schegea che la baselgia catolica saja en ina crisa per il mumaint, guarda Eva-Maria Faber positiv vers il futur. Uss giascha l’attenziun da crear diversas purschidas attractivas per lur students e studentas. Saja quai per exempel cun ina buna maschaida tranter ina purschida digitala ubain era al lieu. In’autra finamira è era da crear purschidas pli individualas. Uschia ch’il dumber dals students da prest 50 possia puspè crescher.