Malas novas per locatarias e locataris: Il tschains da referenza s'augmenta dad 1,5 ad 1,75%, il segund augment entaifer in mez onn. Il tschains da referenza è la basa per calcular ils tschains da locaziun che s'augmentan ussa vinavant.
Ils augments dal tschains da locaziun chaschunan recurs. Il sistem da locaziun actual stat davant la pli gronda prova da cumprova dapi l'introducziun dal tschains da referenza avant 15 onns. Il redactur d'economia da SRF Manuel Rentsch respunda a las dumondas las pli urgentas.
Tge consequenzas ha l'augment ad 1,75%?
In augment dal tschains da referenza per 0,25% signifitgescha ch'ils tschains da locaziun dals contracts existents pon vegnir augmentads per 3%. I dat dentant restricziuns. Mo quels tschains da locaziun dastgan vegnir augmentads, che sa basan sin il tschains da referenza vertent dad 1,5% u ch'èn pli bass. Cun auters pleds: las proprietarias ed ils proprietaris da chasas dastgan augmentar ils fits ch'han dà vinavant ils ultims onns er ils sbassaments als locataris.
Quantas chasadas èn pertutgadas da l'augment dal tschains da locaziun?
En Svizra datti dapli che duas milliuns chasadas en abitaziuns da locaziun. Circa la mesadad da quests contracts da locaziun sa basa sin il tschains da referenza actual. Quai vul dir: D'in augment dal tschains da locaziun èn pertutgadas en Svizra potenzialmain dapli ch'in milliun chasadas.
Cura s'augmentan ils tschains da locaziun?
Ils tschains da locaziun pon vegnir augmentads per il proxim termin da disditga, per regla èn quai 3 mais. Suenter l'augment dal tschains da referenza dastgassan ils tschains da locaziun puspè s'augmentar per il prim d'avrigl, sch'ils locaturs e las locaturas concludan quai uschia.
Il tschains da referenza è gia s'augmentà il zercladur. Dastga il tschains da locaziun gia puspè vegnir auzà?
Per regla gea. Ensemen cun l'augment dal tschains da referenza annunzià il zercladur, pudess quai chaschunar in augment dal tschains da locaziun da 6%. Ultra da quai pon las locaturas ed ils locaturs far valair la chareschia accumulada e l'augment general dals custs.
Tge vul quai dir per las chasadas?
I sa mussa che tscherts locataris na pon betg pli sa prestar las abitaziuns. I dat in return a las veglias furmas d'abitar. Las locatarias ed ils locataris s'uneschan pli e pli e furman cuminanzas d'abitar. I na dat anc betg ina tendenza clera, ma emprims indizis. Tenor l'uffizi federal da statistica s'augmenta il dumber da 3 persunas e chasadas da 4 persunas per l'emprima giada dapi onns puspè, ils tegnairchasa daventan pli gronds.
Cura s'augmenta il tschains da referenza puspè?
Tenor prognosas pudess il tschains da referenza crescher ils onns 2025 e 2026 danovamain per mintgamai 0,25 puncts procentuals. Quai signifitga ch'ils tschains da locaziun da contracts existents pudessan s'augmentar entaifer trais onns per radund 15 % – quai ch'è ina grevezza extraordinaria per bleras chasadas. Las locaziuns ed ils custs accessorics importan circa in quart dal budget d'ina chasada media.
Bleras locatarias e blers locataris sa dostan e fan opposiziun. Tge ha quai per consequenzas?
La massa da reclamaziuns mettan a l'avis il sistem actual – tar las autoritads da mediaziun sa plunan ils cas. Igl è la prova da grevezza la pli gronda dapi l'introducziun da la tariffa dal tschains da referenza avant 15 onns. Gia durant l'emprima mesadad da l'onn èn s'augmentadas las proceduras da mediaziun en ils fatgs da locaziun e da fittanza per dapli che 40%. La primavaira pudessan ils recurs che resultan da l'emprim augment dal tschains da locaziun e dal segund augment – quai che pudess procurar per caos tar las autoritads ed er tar las administraziuns.
