En il Grischun han ils manaschis forestals cultivà radund 3’900 hectaras guaud. Cumpareglià cun l’onn avant saja quai in augment da 10%. Quai ha communitgà l’Uffizi da guaud e privels da la natira. Percunter saja la quantitad da laina racoltada sa reducida levamain per 3% da 390'000 sin 380'000 meters cubics.
Casualmain èsi stà l'onn passà tagls che han dà pli paca laina ch'en media. Ultra da quai sa concentreschan ins actualmain pli fitg sin la tgira dals guauds e betg sin la racolta perquai ch'il prezi da laina è bass.
Sco gia l’onn avant saja la quantitad da laina ch’ins haja stuì racoltar per prevegnir e per reparar donns da guaud s’augmentada per 49% sin 114'000 meters cubic, tge che fa ora radund 30% da l'entira utilisaziun da laina. La raschun principala per ils donns sajan stadas la naiv bletscha durant l'enviern 2023/2024 e diversas tempestas pli pitschnas durant ils mais da stad. Pervia da l'aura umida e la rumida svelta èn dentant restads donns dal bau-scorsa sin in nivel extraordinari bass.
Mesiras per il guaud da protecziun e l'adattaziun a la midada dal clima
La Confederaziun ed il chantun hajan pajà l’onn passà contribuziun da 13,3 milliuns francs als proprietaris da guaud per cultivar ils guauds da protecziun. Ina surfatscha da ca. 2'000 hectaras è vegnida cultivada l'onn 2024. A medem temp sajan vegnidas pajadas contribuziuns da 10 milliuns francs per reparar ils donns ch’ins haja registrà.
La protecziun cunter privels da la natira duai vegnir segirada persistenta cun promover la regiuvinaziun e la stabilitad dals guauds e cun impedir uschè bain sco pussaivel donns consecutivs.