Davant il guaud sur Versomi èn sa rimnadas var 15 persunas, tut las egliadas sa drizzan sin il manader dal seminari. Igl è il segund di dal seminar da chauns da salvament, al qual fan part teams da chauns da tut la Svizra. Tranter els è er il president da l'uniun «Personenspürhunde» Engiadina, Duri Schwenninger. Il trenament vegnia fatg uschè realistic sco pussaivel, declera el.
-
Bild 1 von 3. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
Il trenament è construì uschia che mintga chaun tschertga persul ina poppa, in uschè numna «dummy». L'emprim è Shiva vidlonder, in chaun stgir cun pail lung ed ina clocca enturn culiez.
Nus avain in «dummy» cun restanzas umanas, quellas vegnan messas a disposiziun dals ospitals – l'odur è pia fitg realistica.
Il possessur sa gist uschè pauc sco il chaun, nua che Heinz, la poppa zuppada, giascha en il guaud. Da tschertgar ina persuna sparida saja adina ina lavur da team, declera ina participanta dal Salvament alpin svizzer: «Ti stos leger tes chaun. Sch'el sa deporta tuttenina auter, è quai in segn ch'el ha chattà insatge.»
-
Bild 1 von 3. Quai è «Heinz», la poppa per trenar. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
In trenament saja adina auter ch'in cas urgent, tuttina sch'el è datiers da la realitad. Lavurar cun savair ch'ins pudess chattar ina persuna blessada u schizunt morta na saja betg adina simpel, decleran ils participants. «Cunzunt perquai che noss chantun è uschè pitschen, forsa enconusch'ins la persuna. Quai na dastgan ins propi betg laschar vegnir memia datiers.» Tut auter è quai per ils chauns.
Il chaun na sa betg ch'el tschertga ina persuna sparida – per el èsi adina in gieu.
La finamira n'è dentant betg da chattar persunas mortas, decleran ils participants e las participantas. Ma tuttina saja impurtant da scolar chauns da salvar persunas mortas. Sclerir in cas da spariziun po esser gist uschè impurtant per la famiglia sco il chattar ina persuna viva.