Sch'el audia «terratrembel» haja el immediat in proceder che passia sco in film en ses chau, di Walter Caprezi il president da la gruppa regiunala Redog-Grischun. Sch'i dettia in grond terratrembel sco qua saja uss il cas sin in cunfin da la Tirchia e la Siria, alura saja clar ch'els giajan a gidar. Ils quatter Grischuns cun lur chauns detectur sajan rivads en il lieu ed hajan immediatamain pudì ir en acziun, di Walter Caprez. El haja contact via chat cun ses collegas al lieu.
Tschertga cun chaun detectur
Las organisaziuns en il lieu sa repartian sin l'areal nua ch'i vegnia tschertgà e lura vegnia il chaun detectur tramess per tschertgar il fried da persunas sutterradas. Sch'il chaun haja chattà insatge dettia el en cun urlar ni sgrattar cun las toppas. Sin quai vegnia in segund chaun tramess al lieu per confermar l'annunzia da l'emprim chaun. Suenter la conferma vegnia la glieud da la chadaina da salvament per chavar or la persuna sutterrada. La lavur saja per part er privlusa per ils gidanters. Las ruinas possian dar ensemen ed il pli grond privel sajan terratrembels posteriurs. Cura ch'ils gidanters turnian en Svizra na sa Walter Caprez betg. Il pli cuzzia in servetsch circa in’emna.
Atgna experientscha
Walter Caprez discurra ord atgna experientscha. Avant bunamain dudesch onns è el sez stà en acziun cun ses chaun durant diesch dis a Fukushima en il Giapun. Suenter il return survegnian ils gidanters e las gidantras sustegn psicologic per elavurar lur experientschas. Quai saja fitg impurtant, i sajan experientschas e maletgs ch’ins na vegnia mai ad emblidar. Ad el persulamain haja gidà da discurrer surlonder.
