Vuschar cun 16
Ina dumonda ch'il parlament vegn a discutar è: Duessan ils giuvenils en il Grischun gia eleger e vuschar cun 16? Pia duess la vegliadetgna da vuschar vegnir sbassada da 18 sin 16? Impuls per questa discussiun ha dà ina incumbensa dal deputà Gian Andri Derungs dal Center da l'onn 2022. En tut la Svizra hai gia dà pliras emprovas d'introducir la vegliadetgna da vuschar cun 16. Dentant èn quasi tuttas vegnidas sbittadas dal pievel. Enfin uss pon sulettamain ils giuvenils da 16 onns da la Glaruna vuschar ed eleger – quai gia dapi l'onn 2007.
La proposta actuala vegn – tenor la discussiun en la cumissiun - beneventada da la gronda part dal Cussegl grond .
Pli pauca subvenziun per autos electrics
Cun ina revisiun totala da la lescha duessan las impostas da traffic vegnir adattadas a la tecnologia actuala. I dettia numnadamain adina dapli autos cun ina tracziun alternativa. Ils autos electrics vegnan a stgatschar ils autos cun benzin u diesel.
Actualmain profiteschan autos electrics d’in rabat da taglia da fin 80%. Per avair vinavant las entradas da taglia stoppia quai vegnir midà. Concret duess la taglia da traffic esser neutrala – pia independenta dal auto. La taglia duess vegnir calculada tenor paisa e prestaziun, pia la fermezza dal motor. Autos fitg effizients duessan era profitar en l'avegnir da rabats limitads. Quant gronds è part da la discussiun en il Cussegl grond.
Milano-Cortina, tren d'autos Vereina, luf-tschervers
Sin il plan da lavur da la sessiun d'avrigl èn anc diversas incumbensas e dumondas ch'èn da vegnir scleridas. Tranter auter la dumonda scha il tren d'autos Veraina duess girar gia pli baud pli regular. Tar questa dumonda na vesa la regenza Grischuna nagin potenzial.
Ultra da quai vegnan era ils custs dals gieus olimpics en Italia ad esser in tema. Il concept ha custà 5,5 milliuns francs e la regenza ha en sasez pretendì raps da l'Italia.
Era ils lufs-tschervers vegnan ad esser tema durant la sessiun. Las opiniuns van dapart tar la dumonda sche il chantun duai remplazzar ils trais lufs-tschervers ch'èn vegnids sajettads per sbagl cun dus auters lufs-tschervers.