Autos electrics profitan da gronds rabats da taglia. Quai vul dir ch'i dat ina fora da las entradas en la cassa da vias. Actualmain èn sin via 126'540 autos cun numers grischuns, da quels èn 5% autos electrics e 10% ibrids.
Perquai che quests vehichels pajan pauca taglia en cumparegliaziun cun autos da diesel u benzin, mancan daners en la cassa da vias. Ina persuna che va cun in auto da benzin paja actualmain svelt plirs 100 francs taglia per onn. Tar ils autos electrics surpassa strusch in auto la marca da 100 francs per onn. Per che la finanziaziun da la rait da vias restia garantida dovria in nov model en l chantun Grischun. Per il cusseglier guvernativ Peter Peyer èsi cler che la taglia da las vias stoppia vegnir restructurada.
Sin l'entschatta da l'onn 2027 duai il rabat sa midar. Enstagl da 80%, datti mo pli in rabat da 50%. Fin il 2035 duai la taglia esser guliva tranter autos electrics, autos da benzin e diesel. Era la moda da calcular la taglia duai sa midar.
Paisa e prestaziun sco facturs decisivs
Da nov duai vegnir calculà tenor paisa totala e prestaziun e betg pli tenor il volumen dals cilinders (Hubraum). Quai munta: dapli prestaziun e pli grev che l'auto è e dapli ch'igl è da pajar. Schebain ch'i sa tracta d'in vehichel da benzin, diesel u electric na gioga nagina rolla. Cunquai ch'ils vehichels electrics vegnan construids pli grev, na vegnia betg fatg quint cun la paisa cumplaina. Mintga model d'auto vegn quintà individualmain.
Vendita d'autos electrics
Ch'i dat mintg'onn dapli autos electrics, percorscha er Ivo Volken en la vendita. Dapi 9 onns lavura el sco cussegliader da mobilitad tar Hedin Automotive a Cuira (avant Alpina Garage). A l'entschatta na saja la dumonda da vehichels electrics betg stada uschè gronda sco oz. Il dumber d'autos electrics è bunamain 13 giadas uschè aut sco il 2018. Er il dumber d'autos ibrids è creschì cleramain – oz datti bunamain 10 giadas dapli.
-
Bild 1 von 2. Ivo Volken. Bildquelle: RTR.
-
Bild 2 von 2. Bildquelle: RTR.
El haja nagina tema che la midada da taglia haja ina gronda influenza sin la vendita dad autos electrics. In client sappia il bler gia avant che dumandar, sch'el è in tip electric. Medemamain promovian ils producents gia fitg ils autos. Per part sajan ils autos electrics schizunt in bun tant pli favuraivels ch'il medem model da benzin u diesel, di el.
Tar la cumpra d'in auto nov po il pretsch sa differenziar fermamain. Nus discurrin qua da 5'000 fin 15'000 francs differenza da benzin u diesel.
Betg mo tar BMW, nua che era Ivo Volken lavura, ma er autras marcas promovan fitg vehichels electrics. La fin finala na sa dumondian ins betg, sch'ins paja intgins 100 francs dapli per onn, mabain sch'ins spargnia insaquants 1000 francs tar ina nova cumpra d'in auto electric.
E sco Peter Peyer accentuescha, stoppi la regenza – en il cas che la nova taglia da traffic caschunassia in effect da boomerang sin la cumpra d'autos electrics – ponderar da nov la lescha.