La Partida socialdemocratica dal Grischun ha elegì unanimain Jon Pult sco candidat per il Cussegl federal, quai a chaschun dal di da partida extra-ordinari a Cuira. Il rumantsch è cun ses 39 onns lunsch ora il pli giuven candidat en la cursa per la successiun dad Alain Berset che sa retira. Radund 70 commembras e commembers sajan stads da la partida ed hajan segirà lur sustegn, sco la partida ha ditg sin dumonda. Sco proxim decida ussa la PS svizra tge candidats ch'ella vul trametter en la cursa. L'elecziun sco tala è lura ils 13 da december.
Jon Pult vul daventar cusseglier federal
Il cusseglier naziunal grischun ha annunzià glindesdi, ils 2 d'october, sia candidatura. El veglia ina politica da clima d'in maun offert, e betg dal det mussader. Ed el veglia far ina politica per tuttas persunas, per economia e societad. Sco cusseglier federal veglia el bajegiar punts, e represchentar la generaziun pli giuvna. Jon Pult è 38 onns vegls ed en il Cussegl naziunal dapi quatter onns.
Jon Pult è creschì si tranter l'Engiadina bassa, Cuira e Milaun sco burgais dubel. «La diversitad e la coesiun marcheschan mia vita», ha Pult declerà a la conferenza da pressa. Pult è cussegliader da communicaziun e strategia. En il Cussegl naziunal è el dapi il 2019, avant è el stà en il parlament da la citad da Cuira ed en il Cussegl grond.
Ulteriuras candidaturas pon anc suandar
Jon Pult è il quart candidat socialdemocratic che vul daventar cusseglier federal. Ulteriuras candidaturas pon suandar fin ils 29 d'october.
Igl è avert sche Cédric Wermuth pudess s'imaginar ina candidatura sco co-president da la PS. Era la co-presidenta Mattea Meyer da Turitg vegn adina puspè menziunada. Plinavant vegnan la cussegliera guvernativa bernaisa ed anteriura cussegliera naziunala Evi Allemann, la co-presidenta da las dunnas da la PS Tamara Funiciello sco er il cusseglier naziunal da Turitg Fabian Molina tractadas sco candidats e candidatas pussaivlas.
Or da l'archiv:
