D'introducir mesiras sco per exempel in obligatori da mascras na vesa Marina Jamnicki insumma betg sco necessari. Quai n'è actualmain nagin tema. Il virus è bain anc adina il medem sco avant dus onns, sa midada è dentant l'immunitad da la populaziun. Ussa han 97% da la populaziun anticorpuls.
Tgi che s'infectescha ussa, sa or da vista immunologica cumbatter meglier il virus, e perquai è il decurs da la malsogna pli pauc grev.
Covid-19 daventa pli e pli ina malsogna dapli ch'ins possia classifitgar tar il grad da grevezza d'ina grippa. E tuttina na duessan ins en nagin cas perder il respect dal virus: In'infecziun da Covid-19 è pli pesanta ch'in dafraid e la finala datti differentas dimensiuns d'ina infecziun. En Svizra è anc adina la medema varianta dominanta.
Variantas novas, pli nauschas dal virus n'èn actualmain betg da vesair a l'orizont.
Uschia guarda la media chantunala cun in bun sentiment vers la stagiun d'enviern. L'uffizi da sanadad ha però er communitgà: Sch'il dumber da cas gravants avess da s'augmentar fermamain l'enviern, possia la regenza danovamain prender mesiras. La finamira saja d'impedir che las instituziuns da sanadad vegnian surchargiadas. Eventualas mesiras vegnan coordinadas cun la Confederaziun ed il auters chantuns.
Tips da la media chantunala
Tgi duai far tests? Far in test da corona duain tut quels e quellas che han sintoms. Quai per savair sch'igl è in infect da Covid-19 u betg.
Nua pon ins far il test? Tests pon ins far en apotecas, tar il medi da chasa ubain en il center da test ch'i dat anc adina en differents ospitals.
Tgi paja il test? Per persunas che han gì contact cun ina persuna infectada e persunas che han sintoms èn ils tests gratuits.
Tegnair distanza, lavar bain u dischinfectar ils mauns, purtar ina mascrina e dar regularmain aria èn anc adina meds cumprovads per franar il virus.
Ulteriuras recumandaziuns: Tgi che ha sintoms duai sche pussaivel restar a chasa fin ch'el è puspè fit. Sche quai na va betg, cusseglia Marina Jamnicki da purtar ina mascrina da FFP2 per ir a lavurar. A tut quels e quellas che vulan sa proteger e proteger autras persunas, cusseglia la media chantunala medemamain da purtar ina mascrina, lavar ils mauns e dar aria regularmain.