Siglir tar il cuntegn

Header

Recumandaziuns per il booster
Legenda: RTR
cuntegn

Covid-19 Passa 10'000 persunas han survegnì il booster

Durant l'october han passa 10'000 persunas fatg diever da la purschida e laschà rinfrestgar lur vaccinaziun cunter Covid-19. Quai communitgescha l'Uffizi da sanadad dal Grischun.

Il chantun tira in facit positiv da la campagna da vaccinar da l'october. Da las passa 10'000 persunas che han survegnì la vaccinaziun da rinfrestgament, sajan radund dus terzs persunas sur 65 onns. Il center temporar da booster a Cuira è stà avert l'october enfin ils 5 da november.

En il Grischun han dentant er apotecas, praticas da medis e centers da vaccinar extendì l'october lur offertas per vaccinar cun il booster e purschì ulteriuras pussaivladads da vaccinar senza preannunzia. Questas purschidas vegni a dar vinavant.

Bler interess gia l'emprim d'october

Al cumenzament d'october aveva il chantun quintà cun circa 260 persunas l'emprim di – vegnidas èn dapliras. Tenor Daniel Camenisch, il responsabel dal chantun per la communicaziun pertutgant corona, èn 510 persunas vegnidas vaccinadas fin las 16:00.

video
Il center da booster è avert
Or da Telesguard dals 11.10.2022.
laschar ir. Durada: 2 minutas.

Il chantun Grischun ha prendì en funcziun il center da booster temporar, per promover las vaccinaziuns. Dapli infurmaziuns nua ch'il booster vegn vaccinà.

Campagna naziunala

Il booster duai gidar a sbassar il dumber da cas grevs ed impedir ch'il sistem da sanadad vegn a ses cunfins durant l'atun e l'enviern. Las novas vaccinaziuns duain succeder il pli baud quatter mais suenter il davos tractament u guariziun. Tut las vaccinaziuns che correspundan a las recumandaziuns èn gratuitas. 

Focus sin persunas periclitadas

L'Uffizi federal da sanadad recumonda la segunda vaccinaziun da rinfrestgament en emprima lingia a persunas periclitadas spezialmain ed al persunal da sanadad. Sco persunas periclitadas spezialmain valan per exempel persunas cun malsognas pre-existentas u dunnas en speranza. En segunda lingia vegn la vaccinaziun recumandada per persunas ch'han contact cun persunas periclitadas spezialmain.

Tge vaccins vegnan duvrads per il segund booster?

Avrir la box Serrar la box

Sco vaccin da booster vegn recumandà da duvrar ina virola da mRNA (Moderna e Pfizer/Biontech) ubain ina virola sin basa da proteins (Novavax).

A l'entschatta da las vaccinaziuns stettia er a disposiziun avunda dosas d'ina varianta adattada da Moderna. Quella protegia er da la sut-varianta dad omicron BA.1.

En general vala dentant er ina recumandaziun per tut las persunas a partir da 16 onns. Ina dosa da rinfrestgament saja raschunaivla per sbassar il ristg d'ina infecziun e d'in andament grev. Tar persunas betg periclitadas spezialmain saja il ristg per in andament grev quest atun pli bass che durant l'entschatta da la pandemia.

Plinavant fa il BAG anc attent sin las mesiras simplas per evitar in'infecziun: lavar ils mauns, dar aria regularmain e purtar ina mascrina.

RTR novitads 06:00

Artitgels legids il pli savens

Scrollar a sanestra Scrollar a dretga