La situaziun actuala dals avieuls en il Grischun n’è betg uschè dramatica. Il cuntrari perfin, las cundiziuns actualas sajan fitg bunas, tenor l'Uniun d'apiculturas ed apiculturs dal Grischun.
Nus essan en l’optimal. E la finala van ils avieuls uschè u uschia suenter la natira e quai è il pli bel ch’i dat.
Sa chapescha dettia differenzas localas, ma en general saja la bella aura e las temperaturas chaudas dal cumenzament matg l’aura optimala per ils avieuls.
Sfidas da l’enviern e primavaira
Tenor l’Uniun d’apiculturas ed apiculturs Grischun haja dà quest enviern e la primavaira differentas sfidas. Tranter auter las temperaturas fraidas l’avrigl. Lura hajan ils apiculturs da guardar pli intensiv da lur pievels: Guardar ch’i n'hajan betg fraid ed er dar avunda pavel en lur trucla.
Dentant er las temperaturas chaudas durant il mars sajan stadas ina sfida. Lura han ils avieuls entschet ad uvar memia baud. Quai munta ch’i dovran er dapli pavel ed il chariel d’avieuls sa derasa. Quai è in parasit che fa donn als avieuls.
Avantatg geografic
Dal reminent haja il Grischun in avantatg pervia da la situaziun geografica. Sin curta distanza datti en nossas valladas ina gronda differenza da meters d’autezza. Uschia flureschan las flurs er tuttas durant in zichel in auter temp. Enfin ch’igl èn sin 1'400 meters sur mar forsa entschatta zercladur vi da flurir, è quai sin 1800 meters sur mar forsa per fin zercladur il cas. Uschia chattian ils avieuls, che sgola enfin trais kilometers, adina insanua nectar, di Andrea Müller, responsabel per la tratga d’avieuls en il Grischun.
Sch’ils avieuls sgolan en la Bassa trais kilometers èn els anc adina tuttina blers meters sur mar auts.
Uschia hajan ils avieuls en il Grischun pli ditg temp per sgular ora e chattar nectar ch'en la Bassa. Perquai èn l’apicultura da la Surselva, Elsa Caviezel, e l’apicultur da l’Engiadina, Andrea Müller, er da buna speranza ch’i dat ina allegraivla stagiun cun bler mel d’avieuls: cunzunt sche las temperaturas restan uschia ed il sulegl po tranteren cuchegiar atras ils nivels.
