Avant 20 onns ha Regina Vedana tschentà a Cuira il crap da fundament da la scola da saut Stellwerk. Quai n'era dentant betg il plan oriund da la magistra da saut scolada, plitost casualmain saja ella daventada possessura d'ina scola da saut per uffants e giuvenils.
Planisà n’aveva jau nagut, quai è ì sco da sez.
Uschia haja ella avant 20 onns senza grondas ponderaziuns ordavant surpiglià la localitad dasper la staziun da Cuira, nua che las uras da sautar han anc oz lieu. Ils temps inizials saja quai dentant plitost stà in magazin rustical, e mintgatant hajan temas d'existenza mulestà ils patratgs da Regina Vedana.
Ma insaco saja adina tut sa drizzà a la buna ed il dumber da scolars saja creschì vinavant cuntinuant, uschia che circa 300 scolaras e scolars frequentan actualmain ina u pliras da las 42 lecziuns da saut per emna. Era la schelta da stils da sautar è daventada adina pli gronda, tar las purschidas tutga entant il breakdance, il hip-hop, il saut d'uffants, il ballet ed il saut da jazz.
La possessura Regina Vedana che ha en il fratemp 63 onns numna la scola ses project dal cor. Ella è surtut da chasa en il saut da jazz ed instruescha anc adina sezza intginas gruppas da saut. Per ulteriurs stils da saut ha ella entant emploià 12 coreografas e coreografs.
Per mai èsi impurtant che las scolaras ed ils scolars survegnan ina tribuna.
BEAT – in omagi als temas amur, musica e cuminanza
Passa in onn han durà las preparativas per l'occurrenza che vegn ad avair lieu ils 8 da favrer en la Stadthalle a Cuira. Ins ha stuì arranschar las coreografias, fixar ils andaments e far selecziun da la musica. Cun passa 300 sautunzas e sautunzs preschentia la scola da saut «Stellwerk» ina show che sveglia emoziuns tras saut, musica e tras films curts che vignen mussads. La vegliadetgna da las scolaras e dals scolars va da 4 fin 30 onns, sper ils uffants e giuvenils che visitan actualmain las classas da saut, vegnian numnadamain er in pèr anteriurs scolars ch'èn entant creschids a mussar lur inschign sin tribuna.
Jau crai che quai daventa ina gronda e coola represchentaziun.
En il sprint final: Fin d'emna d'emprova en la sala da gimnastica da la chasa da scola Montalin
Per exercitar tut ils andaments e tut las midadas da las differentas gruppas sin tribuna, han gì lieu la fin d'emna dals 25 e 26 da schaner dus dis d'emprova en la sala da gimnastica da la chasa da scola Montalin a Cuira. En questa halla è vegnida marcada cun bindels alvs che tatgan sin il fund la grondezza dal palc, sin il qual las sautunzas ed ils sautunzs vegnan lura a star en la Stadthalle. Ina classa da saut suenter l'autra ha exercità ses saut, piculezzas èn vegnidas curregidas ed adattadas, per che tut marschia lura era per la cumparsa gronda davant fin 1'500 aspectaturs.
Igl è bel da mussar quai ch'ins ha emprendì als carstgauns, perquai che quels han lura segir plaschair da quai. E nus era.
Suenter questa fin d'emna duessan tuts esser pronts per l'emprova generala, che vegn alura ad avair lieu en la Stadthalle, per che grond e pitschen sappia alura ils 8 da favrer, nua che ses plaz durant la coreografia è.
Impressiuns da la fin d'emna d'emprova en la sala da gimnastica
-
Bild 1 von 5. En la sala da gimnastica Montalin han ins marcà la grondezza da la tribuna da la Stadthalle cun bindels alvs che tatgan sin il fund; 19 x 8 meters vegnan a star a disposiziun per ils pass da saut dals uffants e giuvenils. Bildquelle: RTR.
-
Bild 2 von 5. Betg passar sur la lingia alva che marca durant las provas la fin da la tribuna. Bildquelle: RTR.
-
Bild 3 von 5. Tar il breakdance datti bleras figuras sin il plaun che dovrian forza. Bildquelle: RTR.
-
Bild 4 von 5. Adina puspè vegnan pratitgads ils differents pass. Bildquelle: RTR.
-
Bild 5 von 5. Dovra grazia e coordinaziun – er elements dal ballet classic vegnan ad esser part da la show «BEAT». Bildquelle: RTR.