Siglir tar il cuntegn

Header

cuntegn

Spurtegl d'infurmaziun a Cuira Qua chattan Ucranaisas ed Ucranais respostas

Co chat jau in'atgna abitaziun? Co funcziuna il sistem da scola u co poss jau reciclar endretg il rument? Il spurtegl d'infurmaziun respunda gist da quellas dumondas als Ucranais e las Ucranaisas che vivan en il Grischun.

Dapi tschintg mais datti il spurtegl gist sper la l'administraziun da la citad a Cuira. Atgnamain dueva el esser in lieu d'infurmaziun per il departament da furmaziun, societad e cultura. Mo entras la guerra è el era gist daventà in post d'infurmaziun e cussegliaziun per dumondas en connex cun l'Ucraina.

audio
Il spurtegl da cussegliaziun per fugitivs da l'Ucraina a Cuira
ord Actualitad dals 20.09.2022.
laschar ir. Durada: 2 minutas 29 Secundas.

Purschida per radund 170 persunas

Daryna Potomska che discurra tranter auter ucranais e russ cusseglia, ensemen cun in'autra collavuratura, ils Ucranais e las Ucranaisas che abiteschan tar famiglias indigenas u en atgnas abitaziuns. Quai èn il mument circa 170 da totalmain radund 360 persunas che han stuì fugir da la guerra e che vivan uss a Cuira. Per persunas che abiteschan en alloschis collectivs è il chantun responsabel. Il spurtegl è avert davent da glindesdi fin venderdi, mintgamai l’avantmezdi.

I na dat betg in di che nus respundain betg a dumondas en connex cun l'Ucraina. Tge che gida era èn ils prospects e cudeschets che nus avain translatà per ucranais e russ.
Autur: Daryna Potomska collavuratura dal spurtegl da cussegliaziun

Dumondas da tuttas sorts vegnan respundidas

Bleras dumondas sa tractan da la tschertga d'ina abitaziun, davart il sistem da scola ni da sanadad. Mo era pli «simplas» chaussas sco co èsi da reciclar endretg il rument ni tge hobis pon ils uffants ucranais far en lur temp liber, vegnan scleridas al spurtegl. Quels ch'èn interessads pon vegnir sperasvi, telefonar u scriver in mail.

Uschè ditg sco ch'i dovra

Malgrà che la citad da Cuira ha inizià quest post da cussegliaziun ed infurmaziun na vegnan betg mo persunas da Cuira sperasvi, mabain da quellas da l'entir chantun. Il cusseglier da la citad responsabel, Patrik Degiacomi di, ch'il spurtegl vegnia anc a restar uschè ditg che la purschida è tschertgada.

RTR actualitad 12:00

Artitgels legids il pli savens

Scrollar a sanestra Scrollar a dretga