En il Grischun èn Mauro ed Amalia stads ils nums ils pli populars da pops e poppas l'onn passà. Quai ha communitgà l'Uffizi federal da statistica. En l'entira Svizra èn stads Noah e Mia ils nums ils pli populars. Sin il segund plaz suondan Emma e Liam, sin il terz Sofia e Matteo.
Nums populars en Rumantschia
En Rumantschia hai dà tar las poppas il pli savens Amalia, Gianna e Hannah. Da quellas hai mintgamai dà duas poppas. Era sch'igl n'ha dà nagina nova Maria l'onn 2023 resta quai il num il pli derasà. Quai avant Anna e Claudia.
Ils blers pops sa numnan Mauro (4), Luca (3) e Nino (3). Ils nums ils pli derasads en Rumantschia restan Gian, Martin e Christian.
Num da famiglia
L'Uffizi federal da statistica ha era publitgà ils nums da famiglia ch'èn ils pli frequents – e quai per mintga vischnanca. Sin la carta suten pudais cliccar sin la vischnanca per guardar ils tschintg nums ils pli frequents.
