Tgi ch'ha visità Cuira la fin d’emna ha gì bler da scuvrir. L’aura è bain stada grischa a la terza ediziun dal Street Art Festival, ma las giassas da la citad splenduran plain colur en in nov vestgì. Durant trais dis han 56 artists naziunals ed internaziunals dà tut il pussaivel per dar ina nova parita a la chapitala grischuna. Ils murals dattan in flair cosmopolit a la citad, las vias èn plain visitadras e visitaders ed ins po bunamain far la dumonda: É Cuira uss la chapitala svizra dal Street Art? I para.
Live painting, ma era murals che restan
Enturn ils artists che han malegià live al lieu sias ovras sa radunan rotschas da persunas interessadas. Penellada per penellada vegn guardà minuzius sin il svilup da las ovras unicas. Qua e là datti ina baterlada cun ils artists – l’atmosfera è lucca. En general pon ins sentir ora in grond entusiassem tar ils visitaders. L'art dat da discutar.
Impressiuns dal live painting al Street Art Festival
-
Bild 1 von 24. È quai qua Cuira? Bildquelle: RTR.
-
Bild 2 von 24. Pollo7 viva e lavura sco artist liber a Basilea. Bildquelle: RTR.
-
Bild 3 von 24. L'ovra ch'el ha fatg a Cuira pudess uschia era pender en in muesum. Bildquelle: RTR.
-
Bild 4 von 24. Pollo7 ha in interessant concept. El lavura tranter auter cun restanzas da colurs che fatschentas da picturs avessan uschiglio bittà davent. Bildquelle: RTR.
-
Bild 5 von 24. El po uschia reducir svarlattim e far insatge fitg bel ordlonder. Bildquelle: RTR.
-
Bild 6 von 24. L'artista Kler vegn dal Tessin, pli exact da la Valle Maggia. Bildquelle: RTR.
-
Bild 7 von 24. I na fa betg surstar che Kler ha in bun sentiment per colurs, sch'ella è creschida si enturn la bella natira dal Tessin. Bildquelle: RTR.
-
Bild 8 von 24. L'artist Dhal vi da la lavur. Bildquelle: RTR.
-
Bild 9 von 24. L'artist sidcorean Dhal dus dis pli tard. Bildquelle: RTR.
-
Bild 10 von 24. L'artist Boris lavura cun cuntrasts che crodan en egl. Bildquelle: RTR.
-
Bild 11 von 24. Boris vi da sia ovra. Bildquelle: RTR.
-
Bild 12 von 24. Il maletg da l'artist Boris. Bildquelle: RTR.
-
Bild 13 von 24. Alex Hohl, l'artist da Turitg, lavura cun colurs vibrantas. Bildquelle: RTR.
-
Bild 14 von 24. Ses mural croda ora spezialmain fitg. Bildquelle: RTR.
-
Bild 15 von 24. L'artist Alex Hohl davant sia pictura. Bildquelle: RTR.
-
Bild 16 von 24. L'artista Needapencil. Bildquelle: RTR.
-
Bild 17 von 24. L'artist, sculptur e tatuader da la Corea dal Sid cun il num Baul. Bildquelle: RTR.
-
Bild 18 von 24. L'ovra da Baul splendura en colurs da pastel. Igl è il cuntrast tranter questas colurs miavlas ed il sujet plitost somber che fan unica quest'ovra. In memento mori. Bildquelle: RTR.
-
Bild 19 von 24. Mise en Place d'in artist. Bildquelle: RTR.
-
Bild 20 von 24. Nordschwarz da Winterthur na laschan betg disturbar da la plievgia. Bildquelle: RTR.
-
Bild 21 von 24. Il maletg da Nordschwarz fa sa dumendar sche ils artists han encuretg ora extra quest motiv per Cuira. Ma qua dat il luf da discutar sin autras modas. Bildquelle: RTR.
-
Bild 22 von 24. Nordschwarz a la lavur. Bildquelle: RTR.
-
Bild 23 von 24. Aylo & Seca One lavuran en dus vi d'in mural. Bildquelle: RTR.
-
Bild 24 von 24. Tgi che va sper il Manor a Cuira ora, lez vegn beneventà d’in mural en dialect da Cuira. Bildquelle: RTR.
En il futur anc bler dapli colur a Cuira
Punctualmain sin il festival d’art ha la citad da Cuira dà liber novas surfatschas per graffitis legals. L’emprima da quellas è vegnida stgaffida avant 10 onns. Ina bella moda da festivar il giubileum da questas surfatschas ch'han rinforzà la scena da Street Art a Cuira. Sin questas surfatschas po mintgina e mintgin viver ses talent. I dat dentant reglas:
- Be sprayar en zonas lubidas.
- Far a fin quai ch’ins ha cumenzà.
- Nagina discriminaziun
- Respectar auters artists ed artistas, sco er abitantas ed abitants ed er il ruaus da la notg.
- Dismetter en il dretg lieu ils vapurisaders vids.
La citad sustegna uschia la scena da Street Art e rinforza il svilup e talent da bain inqual artista ed artist. Uschia pon ins sa legrar sin speranza proximas ediziuns dal pli probabel pli colurà festival dal Grischun.
In dals 14 murals
-
Bild 1 von 3. Il duo Telmo Miel dals Pajais Bass han dà ina nova parita al bajetg da la Gürtelstrasse 11. Bildquelle: RTR.
-
Bild 2 von 3. Il mural è gigantics e fa grond'impressiun. Bildquelle: RTR.
-
Bild 3 von 3. Quai è be in da 14 murals en la citad da Cuira. I po uschia vegnir bel da scuvrir tut ils murals novs en la citad. Bildquelle: RTR.