Simona Caminada è activa dapi prest 15 onns en differentas funcziuns per la SRG SSR. En sia carriera da plirs onns sco collavuratura da medias e sco experta d’examens ad instituziuns da scolaziun da medias ha ella elavurà ina profunda chapientscha per tut ils geners da medias, da medias digitalas sur radio fin a televisiun.
Ella ha blera experientscha sin il sectur da medias digital, en spezial quai che reguarda la cumbinaziun specifica da cuntegns linears e digitals fatgs per ina tscherta gruppa en mira. Caminada dat dumogn a l’entir repertori dal schurnalissem local fin a la rapportaziun internaziunala; il davos ha ella rapportà per SRF da Roma.
Sia carriera ha la dunna grischuna da 39 onns cumenzà tar «La Quotidiana». Suenter ha ella fatg in praticum tar RTR, l’unitad regiunala da la SRG SSR. Il 2012 ha ella terminà ses studi a l’Universitad da Hamburg cun in master en schurnalissem. Quel ha ella fatg suenter il diplom da bachelor a l’Universitad da Turitg en publicistica e scienza da la communicaziun e dal film. Ella è maridada, ha in uffant ed abita cun sia famiglia a partir da la stad 2026 a Cuira.
Sco nova directura vegn Simona Caminada a nizzegiar pli intensivamain il potenzial publicistic da RTR ed a purtar il program anc pli datiers al public, e quai cun dar attenziun speziala a giuvnas gruppas en mira. Ella sa referescha sapientivamain a la vasta savida ed experientscha dals teams da tut las regiuns en l’intschess da RTR.
Ensemen cun mes team futur vi jau sviluppar RTR ad in medium principal modern e digital per tut las Rumantschas e tut ils Rumantschs.
Ella succeda a Nicolas Pernet ch'ha midà da RTR en la direcziun da la SRG SSR. Simona Caminada entra en sia nova funcziun il 1. da settember 2026. Fin sia entrada en uffizi maina in team transitoric interimisticamain l’unitad regiunala.
SRG SSR en transfurmaziun
La SRG SSR è en transfurmaziun e sto far gronds respargns. Fin il 2029 sto ella spargnar radund 270 milliuns francs, quai en consequenza da la reducziun da la taxa da radio e televisiun sin 300 francs ch'il Cussegl federal ha decis. Plinavant sa mida l'utilisaziun da medias en la societad e las entradas commerzialas da reclama e sponsoring van enavos.
Per daventar ina organisaziun da medias pli digitala, effizienta e flexibla ha il cussegl d'administraziun elegì il mars trais novas persunas en la direcziun centrala da la SRG SSR. Nicolas Pernet ha surpiglià l'avrigl la funcziun da directur Purschida ed ha bandunà Radiotelevisiun Svizra suenter tschintg onns.