Transfurmaziun SRG SSR - Cuntegns vinavant da las regiuns – servetschs però naziunals
Fin il 2029 sto la SRG SSR spargnar var 270 milliuns francs. Quai è necessari perquai ch'il Cussegl federal ha decis da reducir la taxa da radio e televisiun sin 300 francs per chasada e las entradas da reclama sa reduceschan vinavant.
La SSR sto spargnar fin l'onn 2029 var 270 milliuns francs – pia 17 pertschient da ses budget.
Perquai che quai na po betg vegnir cuntanschì mo cun spargnar, ha la direcziun da la SSR annunzià l'atun da l'onn passà in project da restructuraziun cumplessiv.
Oz èn vegnids enconuschents emprims resultats dal project: Uschia duain vegnir fusiunads differents secturs en l' interpresa.
La restructuraziun vegn er a chaschunar ina reducziun dal persunal: la SSR fa quint cun «in dumber pli aut da trais cifras» fin la fin dal 2029.
Fin uss vegnivan mesiras da spargn repartidas en proporziun sin las quatter unitads da la SRG SSR (SRF, RTR, RSI, RTS). Cunquai ch'ils var 270 milliuns francs correspundan a ca. 17% dal budget total, na saja quai betg pli pussaivel. Perquai dovria midadas pli grondas. Quai ha l'interpresa communitgà glindesdi. L'analisa en il rom dal project da transfurmaziun «Enavant SRG SSR» haja mussà che cunzunt las structuras organisatoricas sajan per part cumplexas ed impedeschian uschia che la SRG SSR possia lavurar a moda effizienta. Er duaja l'entira interpresa vegnir pli movibla e digitala quai che resguarda cunzunt il consum da medias che sa mida pli e pli davent dals chanals linears da radio e televisiun en direcziun applicaziuns, online e plattafurmas da streaming.
Cuntegns regiunals – servetschs naziunals
Il coc dal project da transfurmaziun è da producir vinavant il program / ils cuntegns en las regiuns. Quai en las spartas infurmaziun/novitads, cultura e societad, divertiment e musica, savida e furmaziun. Las spartas sport e ficziun vegnan organisadas naziunalmain per l'entira SRG e tut las regiuns. En las regiuns lavuran lura teams dal fatg, mintgamai en la lingua regiunala.
Er organisads da nov sin nivel naziunal vegnan la producziun (tut quai ch'i dovra per producir livestreams, emissiuns da televisiun e radio etc.), la partiziun da tecnologia ed informatica, la distribuziun, las finanzas sco er las resursas umanas. Fin uss aveva mintga unitad d'interpresa atgnas partiziuns per quellas spartas. Per part vegniva bain collavurà tranter las unitads d'interpresa, però datti qua tenor ils responsabels dal cussegl d'administraziun sco er dal project da transfurmaziun anc bler potenzial.
Las midadas organisatoricas en detagl
Avrir la boxSerrar la box
Esser francada regiunalmain – quai resta la DNA e la fermezza da la SRG SSR: Las unitads d’interpresa dad oz RSI, RTR, RTS e SRF collavuran sistematicamain pli ferm en l’avegnir. Per meglierar la collavuraziun en il program sur tut las regiuns or introducin nus liantamain novs instruments. Las regiuns garanteschan vinavant d’esser datiers dal public cun lur cuntegns. Plinavant restan ellas francadas e preschentas sin plaun regiunal. Ellas sviluppan la purschida or d’ina perspectiva linguistic-regiunala en ils geners infurmaziun, divertiment e musica, societad e cultura, savida e furmaziun. Las regiuns linguisticas èn er vinavant responsablas per la distribuziun regiunala, p.ex. ils chanals da televisiun e da radio, apps, euv. Uschia focusseschan ellas l’incumbensa publicistica da la SRG SSR.
La ficziun ed il sport vegnan manads ed organisads a moda surordinada cun teams dal fatg linguistic-regiunals sin nivel da la SRG SSR: Da nov vegnan ils cuntegns coordinads e manads strategicamain sur tut las regiuns or. En il sport collavuran las regiuns linguisticas gia oz intensivamain e blers servetschs sco ils dretgs da sport e gronds projects vegnan prestads sin nivel naziunal. Da reunir las redacziuns en in’unitad è in pass logic per intensivar vinavant la collavuraziun en il process da producziun e per nizzegiar sinergias. La ficziun duai esser coordinada anc meglier en tut la SRG SSR per pudair reparter sur tut l’onn a moda ideala p.ex. atgnas producziuns sco serias sin las atgnas plattafurmas digitalas. Las producziuns concretas vegnan fatgas vinavant al lieu cun ils teams dal fatg regiunals ed ensemen cun ils partenaris en las regiuns.
Ils secturs da funcziun resursas umanas, finanzas e tecnologia/IT vegnan manads e responsads communablamain sur tut la SRG SSR ed organisads cun teams dal fatg regiunals. Uschia simplifitgescha e reducescha la SRG SSR l’organisaziun per far vinavant in ferm program cun in preventiv pli pitschen. Quai che nus pudain far da cuminanza faschain nus en l’avegnir er da cuminanza. Las persunas dal fatg responsablas en las regiuns restan damanaivel dals teams e da la fatschenta quotidiana.
La producziun vegn concentrada sco er manada e responsada sur tut la SRG SSR or: Oz produceschan las unitads d’interpresa lur cuntegns per gronda part independentamain ina da l’autra. Ils teams regiunals vegnan da nov manads tuts sur in’unica lingia communabla. Uschia daventa tut pli effizient e pli movibels. Las plazzas da lavur restan però vinavant en las regiuns.
Daventar pli digital e segirar uschia l’avegnir da la SRG SSR. La SRG SSR metta pli ferm en il center las disas dal public ch’èn sa midadas ed orientescha ses pensar ed agir al diever digital. La SRG SSR rinforza las atgnas plattafurmas digitalas e procura ch’ils cuntegns cuntanschian ses public. Quai fa ella danov communablamain via ina direcziun naziunala e betg mintga regiun per sasezza. Uschia vul ella instradar ina profunda midada digitala, entant ch'ella ha vinavant quità dals chanals da televisiun e da radio classics.
SWISS TXT: Cun reunir la tecnologia/IT sut ina direcziun da l’entira gruppa daventa SWISS TXT part da l’organisaziun dal concern. Las prestaziuns e l’expertisa da SWISS TXT daventan uschia part integrala da la gruppa da la SRG SSR. La societad affiliada da fin ussa vegn schliada en il decurs da la realisaziun dal project.
Swissinfo: Swissinfo collavura en il futur pli stretg cun tut las autras unitads d’interpresa cun la finamira da servir vinavant uschè bain sco pussaivel als basegns dal public a l’exteriur. Tut tenor il process politic che determinescha las cundiziuns da basa finanzialas da la Confederaziun per il mandat da la SRG SSR a l’exteriur vegn organisà da nov il posiziunament da Swissinfo en la SRG SSR.
Anc betg cler: consequenzas per il persunal e sin il program
Cler è fin uss ch'il program da spargn vegn ad avair consequenzas tant per il persunal sco er per la purschida. Sco la directura generala Susanne Wille ha ditg, na saja betg pussaivel da spargnar questa summa senza effects sin la purschida. La finamira saja spargnar tar las structuras ed ils process per proteger il schurnalissem. Actualmain vegnia examinà tge collavuraturas e collavuraturs ch'èn exact pertutgads da las mesiras. Realisada vegnia la nova organisaziun pass per pass a partir da l'entschatta 2026.
Fermezzas cumprovadas – structuras cumplexas
La basa per questa decisiun è stada in’analisa cumplessiva, sco il cussegl d'administraziun e la direcziun generala scrivan en la communicaziun. Ella mussa: la SRG SSR è cun sias marcas regiunalas damanaivel dal public. Otg da diesch persunas en Svizra nizzegian almain emnilmain la purschida da las unitads d’interpresa RSI, RTR, RTS e SRF ed èn fitg cuntentas cun ils cuntegns. Las collavuraturas ed ils collavuraturs da la SRG SSR disponan d’autas cumpetenzas dal fatg en divers secturs. La SRG SSR porscha cun success cuntegns schurnalistics sin tut ils chanals. La spierta plurilingua è unica entaifer la Svizra.
L’analisa ha però er mussà: Quai ch’ha fatg ferma la SRG SSR en il passà – il focus sin ils chanals linears radio e televisiun, la ferma differenziaziun linguistic-regiunala e las unitads d’interpresa decentralas – ha manà a structuras creschidas istoricamain. Quellas èn per part cumplexas e difficulteschan la coordinaziun. En vista a la transfurmaziun tecnologica, a la midada accelerada quai che reguarda l’utilisaziun da las medias e pervi d’in rom finanzial pli bass ston questas structuras vegnir simplifitgadas.
