L’uniun Wildtierschutz Schweiz ha inoltrà ina denunzia cunter il chatschader ch’ha sajettà in chaun en corda la sonda notg dals 10 da favrer or da da sia chasa a Sedrun. Era cunter il guardiachatscha responsabel per la regiun sco cunter l’Uffizi da chatscha e pestga è vegnì fatg denunzia.
La procura publica grischuna ha confermà sin dumonda da RTR che l’uniun cun sedia a Zezras ha inoltrà ina denunzia cun trais denunziads. Dapli na dastgian els betg dir tier cass currents en scleriment, uschia la procura publica. Quai n’è betg l’emprima denunzia da l’uniun Wildtierschutz Schweiz encunter l’Uffizi da chatscha e pestga dal Grischun, gia il 2017 ha l’uniun gì inoltrà ina denunzia en connex cun plazzas d’estga.
Era ha l’uniun gì lantschà l’iniziativa per ina chatscha etica ch’è vegnida refusada dal pievel grischun il zercladur 2021. Sco il president da l’uniun Roberto Bapst ha ditg envers la gasetta 20 minutas pretenda l’uniun in general scumond da chatscha e da sajettar en lieus abitads ed in scumond general da metter estga.
Per las persunas e per l’uffizi da catscha vala la presumziun d’innocenza.
Or da l'archiv: